दरभंगा जिलामे “एक पेड़ माँ के नाम” अभियान पोषण पखवाड़ाक उद्घाटन करैत आईसीडीएसक डीपीओ चाँदनी सिंह शनिदिन कलेक्ट्रेट परिसरमे पौधा रोपलनि। एहि दौरान ओ कहलनि जे प्रधानमंत्री देशभरिमे ‘एक पेड़ माँ के नाम’ पर अभियान शुरू कयलथि अछि। अभियानक अन्तर्गत जिलामे लाखो गाछ लगाओल जायत। बगान करयवलाक अपन मायक स्मृति सदैव ताजा रहत। ओ कहलनि जे सरकार आम जनताक सहयोगसँ कोनो अभियानकेँ सफल बना सकैत अछि। प्रत्येक नागरिककेँ अपन मायक नाम पर एकटा पौधा रोपबाक चाही।
डीपीओ कहलनि जे जलवायु परिवर्तन आ बढ़ैत प्रदूषणक कारण वन संपदा घटि रहल अछि। एहि कारणेँ पृथ्वी पर कतहु बाढ़ि आबि रहल अछि आ कतहु सूखा पड़ि रहल अछि। ओ आगू कहलनि जे आईसीडीएस द्वारा जिलाक सभ आंगनवाड़ी केन्द्रमे एकटा पौधा रोपल जायत। इ पर्यावरण केर स्वच्छ राखत। प्रदूषण कम भs जाएत। ओ कहलनि जे आंगनबाड़ी केन्द्रमे गाछ लगेलासँ ओतयक वातावरण शुद्ध होयत। एहि पहलसँ वन संपदा बढ़त।
पोषण मासक आयोजन १ सँ ३० सितम्बर धरि कयल जायत। कार्यक्रममे बाल विकास परियोजना अधिकारी सदर, बहादुरपुर, जिला मिशन संयोजक ऋषि कुमार, वन स्टॉप सेंटर आदि केर अजमतुन निशा आदि उपस्थित छलथि।
