गया जिलामे ५० लाखक नकली दवाइ आ सौंदर्य प्रसाधन जब्त, मुख्य आरोपी भागल

गया
*

गया जिलाक मानपुर प्रखंडक मुफ्फासिल थाना क्षेत्रक भुसंडा देवी स्थानमे नकली दवाइ आ सौंदर्य प्रसाधनक एकटा पैघ व्यवसायक पर्दाफाश भेल अछि। पुलिस आ ब्रांड प्रोटेक्शन सर्विस प्राइवेट लिमिटेडक संयुक्त अभियानमे लगभग ५० लाख टाकाक नकली दवाइ आ कॉस्मेटिक उत्पाद बरामद कयल गेल अछि।

बरामद कयल गेल नकली उत्पादमे बीपीक दवाई चेमरल फोर्ट टैबलेट, गैसक पैन ४०, सीपला डीन वुड़ा कोस्ट इनहेलर, हिमालया कंपनीक फेस वॉश, औस्थलीन सिरप, डिटॉल एंटीसेप्टिक, शुगर फ्री गोल्ड, जाइडस सिरप, स्टेमेटील टैबलेट, एभील इंजेक्शन, शोमेंटैक्स, कैनकोर ५ मिलीग्राम, करवोफेज टैबलेट शामिल अछि।

ब्रांड प्रोटेक्शन सर्विस प्राइवेट लिमिटेडक एमडी मुस्तफा हुसैन मुफ्फासिल पुलिस स्टेशनक सहायतासँ ई कारवाई कयलनि। छापामारीक दौरान नकली दवाइक प्रमुख व्यापारी अमित कुमार आ ओकर सहयोगी भागि गेल, जखनि कि पुलिस ओकर ठिकानासँ पैघ मात्रामे नकली उत्पाद बरामद कयलक।

गयाक जीबी रोड चौकक निवासी अमित कुमार संजीत कुमार विश्वकर्माक घरमे किरायेदारक रूपमे रहैत छल आ बहुत दिनसँ नकली दवाइक कारोबार करैत छल। पुलिसकेँ भनक लगिते अमित कुमार घटनास्थलसँ भागि गेल।

मुफस्सिल थानाध्यक्ष रघुनाथ प्रसाद कहलनि जे एखन धरि कोनो गिरफ्तारी नहिं भेल अछि, मुदा नकली दवाइक व्यापारक संबंधमे मामिला दर्ज कयल गेल अछि। छापामे ब्रांड प्रोटेक्शन सर्विसेज केर मजाद अहमद आ मोहम्मद साहदूलउल्लाक महत्वपूर्ण भूमिका छल।

पुलिस आब फरार अभियुक्तक खोज कऽ रहल अछि आ मामिलाक गहन जाँच कऽ रहल अछि। नकली दवाइ आ कॉस्मेटिक उत्पादक एहि पैघ रैकेटक पर्दाफाश एहि क्षेत्रमे एकटा महत्वपूर्ण सफलता मानल जा रहल अछि।