मधुबनी जिलाक खेल प्रेमीक लेल एकटा नीक खबरि अछि। जिलाक झंझारपुर नगर परिषद क्षेत्रमे स्थित ललित करपुरी स्टेडियमक लग झंझारपुर खेल परिसरक निर्माण कयल जायत। एकर निर्माणकेँ मुख्यमंत्री क्षेत्र विकास योजनाक अन्तर्गत मंजूरी देल गेल अछि। एकरा लेल वित्तीय वर्ष 2023-24 के लेल 1,40,84,000 रुपया (एक करोड़ चालीस लाख चौरासी हजार) केर राशि स्वीकृत कयल गेल अछि। ई जानकारी झंझारपुरक विधायक आ राज्यक उद्योग मंत्री नीतीश मिश्रा देलनि अछि।
मंत्री नीतीश मिश्रा सेहो सोशल मीडिया पर ई जानकारी दैत एकटा वीडियो शेयर कयलनि अछि। जाहिमे निर्माणक बाद झंझारपुर खेल परिसरक प्रतीकात्मक रूप देखाओल गेल अछि। एहि निर्माणक जानकारी दैत ओ कहलनि जे एहि खेल परिसरक निर्माणक उद्देश्य झंझारपुरक युवा लोकनिकेँ खेलक क्षेत्रमे नीक सुविधा आ संसाधन उपलब्ध करायब अछि। परिसरक निर्माणक स्वीकृति भेटि गेल अछि आ निविदा प्रक्रियाधीन अछि।
झंझारपुर खेल परिसरमे २४००० वर्ग फीटक खेल मैदान, फुटसल, जॉगिंग ट्रैक, स्पोर्ट्स लाइट, शौचालय, चेंजिंग रूम, पेयजल आ कतेको अन्य सुविधा होयत। एकर अतिरिक्त परिसरमे खेलाड़ीसभक लेल क्रिकेट, फुटबॉल, कबड्डी आदि विभिन्न खेलक लेल सभ आवश्यक सुविधा उपलब्ध होयत। खास बात ई अछि जे रातिमे खेल गतिविधिक सुविधाक लेल प्रकाशक उचित व्यवस्था सेहो कयल जायत। मंत्री नीतीश मिश्र कहलनि जे हमरा पूरा विश्वास अछि जे झंझारपुर खेल परिसर बनलासँ झंझारपुरक युवाकेँ खेलक क्षेत्रमे आगू बढ़बाक अवसर भेटत। ई ओकर विकासमे सेहो सहायक सिद्ध होयत। एहि खेल परिसरक उपयोग कऽ युवा लोकनि नहिं केवल अपन खेल कौशलकेँ बढ़ाओत बल्कि भविष्यमे राष्ट्रीय आ अन्तर्राष्ट्रीय स्तर पर अपन छाप छोड़ि देशक नाम सेहो रौशन करत।
