राज्यसभा सांसद मिथिलाक प्रकाश पुरुष संजय झा’क आश्वासन आ प्रसिद्ध शिक्षाविद मिथिला रत्न डाॅ संदीप झा’क मिथिलाक प्रति संकल्पक प्रबल उद्घोषक बीच, हजारो लोकसँ अधिक भरल ठाणें, मुंबईक चर्चित डाॅ काशीनाथ घानेकर नाट्यगृहमे आठम धीरज प्रतिभा सम्मान समारोह रविकेँ अनेक आशा-अपेक्षाक संग सुसम्पन्न भेल।
एहि बेरक ई समारोह पिछला सभ कीर्तिमानकेँ पाछा छोड़ि देलक आ लगभग चारिसँ पाँच सय मेधावी छात्र-छात्राकेँ सम्मान पत्र, मोमेंटो आ सम्मान नीधिसँ उत्साहित कयल गेल। संरक्षक डाॅ. संदीप झा’क उत्साहवर्धक प्रेरणादाई उद्घोष नहिं केवल छात्र-छात्राकेँ उत्साहसँ सराबोर कयलक बल्कि मिथिलाक उज्जवल भविष्यक लेल हुनक संकल्प उपस्थित समस्त अभिवावकगणमे नव चेतना ओ उत्साहक सृजन कयलक।
तहिना मिथिलाक लाल राज्यसभा सांसद संजय झा’क सहज वाणी आ आश्वासन सभगोटेकेँ हृदयमे हुनका प्रति एकटा अलग अनुरागक अनुभूति भेल। डाॅ. संदीप झा जखनि संजय झाकेँ मिथिलाक विकास पुरुष कहैत ललीत बाबूसँ तुलना कयलनि तखनि हाॅलमे बैसल सभ गोटे ठाढ़ भऽ करतल ध्वनिसँ अनुमोदन कयलनि, इ दृश्य अद्भुत छल।
डाॅ. संदीप झा मैथिल समन्वय समिति दिसिसँ एकटा ज्ञापन सौंपलखिन आ जकर मुख्य माँग प्रवासी जनक लेल रेल यातायात सुविधा बढ़ाबय लेल छल, जकरा संजय झा शिघ्र आश्वासन देलनि जे एहि लेल रेलमंत्रीसँ सप्ताह-दस दिनक भीतर बात राखब।
अनेको गणमान्य अतिथिकेँ सेहो सम्मानित कयल गेल। विस्तृत समाचार आगुक अंकमे।
