पूर्व प्रधानमंत्री भारत रत्न अटल बिहारी बाजपेयी जीक छठम पुण्यतिथि केर अवसर पर विद्यापति सेवा संस्थानक तत्वावधानमे आगामी 16 अगस्त कें एमएलएसएम कॉलेजक सभागारमे श्रद्धांजलि सभा आयोजित कयल जायत। जानकारी दैत विद्यापति सेवा संस्थानक महासचिव डॉ बैद्यनाथ चौधरी बैजू बतोलनि जे 16 अगस्त कें पूर्वाह्न 11 बजेसँ आयोजित होबय बला एहि सभाक शुभारंभ ललित नारायण मिथिला विश्वविद्यालयक कुलपति प्रो संजय कुमार चौधरी केर कर-कमलसँ कयल जायत। मंगलदिन हुनकासँ भेंट करय गेल प्रतिनिधि मंडलकें ओ एहि कार्यक्रममे अपन उपस्थिति केर स्वीकृति देलनि। प्रतिनिधि मंडलमे हुनकर अतिरिक्त एमएमटीएम कॉलेजक प्रधानाचार्य डा उदय कांत मिश्र, एएमएम काॅलेजक प्राचार्य देवेन्द्र कुमार झा एवं संस्थानक मीडिया संयोजक प्रवीण कुमार झा आदि शामिल छलाह।
डा बैजू कहलनि जे सातो कोटिक करोड़ों मिथिलावासी केर मातृभाषा मैथिलीकें संविधानक आठम अनुसूचीमे गौरवशाली स्थान प्रदान करबामे पूर्व प्रधानमंत्री भारत रत्न अटल बिहारी वाजपेयी केर महत्वपूर्ण भूमिका छलनि। हुनक श्रद्धांजलि सभामे सहभागिता लेल बिहार सरकारक काबीना मंत्री नीतीश मिश्र, दरभंगाक सांसद डा गोपालजी ठाकुर, राज्यसभा सांसद डा धर्मशीला गुप्ता, नगर विधायक संजय सरावगी, कामेश्वर सिंह दरभंगा संस्कृत विश्वविद्यालयक कुलपति प्रो लक्ष्मी निवास पांडेय, पूर्व कुलपति प्रो देव नारायण झा, प्रो शशिनाथ झा, पूर्व विधान पार्षद प्रो दिलीप कुमार चौधरी आदि कें आमंत्रित कयल गेलनि अछि।
