कांग्रेस परिवार एतय १०० सँ बेसी घर बनेबाक करैछ वादा : राहुल गांधी वायनाडमे

वायनाड
*

लोकसभामे प्रतिपक्षक नेता आ कांग्रेस नेता राहुल गाँधी, कांग्रेस महासचिव प्रियंका गाँधी वाड्रा आ अन्य नेतासभकेँ केरलक वायनाडक चुरलमाला, मेप्पाडीमे जिला प्रशासन, वन अधिकारी द्वारा जानकारी देल गेल।
वायनाड त्रासदीक बाद राहुल अपन बहिन प्रियंकाक सङ्ग काल्हि ओतय पहुँचल छलाह। ओ कहने छलथि, “हम सभ एतय स्थितिक जायजा लेबाक लेल आयल छी। ई बहूत दुखद अछि। एहि दुखद परिस्थितिमे पीड़ित लोकसँ गप्प करब आसान नहिं होइत अछि किएक तँ नहिं बुझैत अछि जे हुनका सभसँ की कहल जाय।”

लोकसभामे प्रतिपक्षक नेता राहुल गाँधी कहलनि अछि जे कांग्रेस वायनाडमे विनाशकारी आपदाक पीड़ितक मदति लेल तैयार अछि। कांग्रेस वायनाडमे १०० सँ बेसी घर बनयबाक वादा करैत अछि। वायनाडक पूर्व सांसद कहलनि जे केरलमे एतेक भयानक त्रासदी कहियो कोनो एकटा क्षेत्रमे नहिं देखल गेल छल। हम दिल्लीमे मामिला उठायब। राहुल गाँधी एखनि भूस्खलनक पीड़ितसभसँ भेँट करबाक लेल वायनाडक दौरापर छथि।

कांग्रेस सांसद राहुल गांधी कहलनि, “हम काल्हिसँ एतय छी। ई एकटा भयानक त्रासदी अछि। आइ हम स्थानीय प्रशासन आ पंचायतक सङ्ग बैसार कयलहुँ आ ओ लोकनि हमरासभकेँ हताहतक संख्या, नष्ट भेल घरक संख्या आ ओकर रणनीतिक विषयमे जानकारी देलनि। हम हुनका सभकेँ कहलहुं जे हम अईठाम मददि केर लेल आयल छी।
ई अलग तरहक त्रासदी अछि। ओ आगू कहलनि, “कांग्रेस परिवार एतय १०० सँ बेसी घर बनेबाक लेल प्रतिबद्ध अछि। केरलमे एतेक भयानक त्रासदी पहिने कहियो नहिं भेल छल। हम एकरा दिल्ली आ एतय मुख्यमंत्री (पिनराई विजयन) केर समक्ष उठायब। ई एकटा अलग स्तरक त्रासदी अछि आ एकरा अलग तरहसँ देखबाक चाही।”

एहिसँ पहिने बृहस्पति दिन राहुल गाँधी अपन बहिन प्रियंका गाँधी वाड्राक सङ्ग वायनाडक भूस्खलन प्रभावित क्षेत्रक दौरा कयलनि। राहुल कहलनि जे विनाशकारी भूस्खलनमे परिवारक सदस्य आ घरक क्षति देखि ओ बहुत दुखी छथि। ओ एकरा राष्ट्रीय आपदा कहलखिन। ओ कहलनि, ई त्रासदी वायनाड, केरल आ देशक लेल एकटा भयानक त्रासदी जकाँ अछि। राहुल वायनाडमे कहलनि, “हम सभ एतय स्थितिक जायजा लेबाक लेल आयल छी। ई बहुत दुखद अछि जे लोकसभ अपन परिवार आ घर गमा चुकल छथि। आजुक दिन हमरा लेल बहुत कठिन छल। ई हमर प्रयास होयत जे सभ पीड़ितकेँ अपन अधिकार भेटय।

एहि त्रासदीकेँ अपन पिताकेँ गमाबय जकाँ दर्दनाक बताबैत राहुल कहलनि, “हमरा ओ दिन याद अछि जखन हमर पिताक मृत्यु भऽ गेलनि, हमरा केहन अनुभव भेल छल। एतय एहि त्रासदीमे लोकसभ मात्र अपन पिताकेँ नहि गमा चुकल छथि, अपितु कतेको लोक अपन पूरा परिवारकेँ गमा चुकल छथि। हम जनैत छी जे हम की अनुभव कयलहुँ आ ई बहुत खराब आ भयानक अछि।”

एहिसँ पहिने राहुल गाँधी अपन बहिन प्रियंका गाँधीक सङ्ग वायनाडक भूस्खलनसँ प्रभावित चूरलमाला क्षेत्रक दौरा कयलनि। राहुल वायनाडसँ लोकसभा सांसद रहि चुकल छथि। २०१९ केर चुनावमे ओ एहीठामसँ चुनल गेल छलथि। २०२४ केर चुनावमे सेहो राहुल केरलक वायनाडसँ चुनाव लड़लथि आ जीतलथि, मुदा एहि बेर उत्तरप्रदेशक रायबरेली सीटसँ सेहो चुनाव लड़ने छलथि आ एतयसँ सेहो जीतलथि, फलतः एक सीट राखय केर चयनमे रायबरेली सीट रखलथि आ वायनाड छोड़ि देलनि।