प्रधानमंत्री नरेन्द्र मोदी कीव (यूक्रेन) जायवाला छथि। सूत्र बतौलक जे प्रधानमंत्री अगस्तमे कीवक यात्रा करताह। रूसक सङ्ग युद्धक बीच प्रधानमंत्री मोदीक यूक्रेनक ई पहिल यात्रा होयत।
जुलाईमे दुनू देशक बीच उच्च स्तरीय वार्ता भेल, जाहिमे एस जयशंकर आ यूक्रेनक विदेश मंत्री दिमित्रो कुलेबा आ राष्ट्रीय सुरक्षा सलाहकार अजित डोभाल आ यूक्रेनक आंद्रेई यरमाक सङ्ग फोन पर बात भेल छल।
विदेश मंत्री एस जयशंकर एक्स पर दुनू देशक बीच द्विपक्षीय सम्बन्धकेँ आगू बढ़यबाक बात कहने छलाह।
प्रधानमंत्री नरेन्द्र मोदी जूनमे इटलीमे जी-७ शिखर सम्मेलनक दौरान यूक्रेनक राष्ट्रपति वोलोडिमिर जेलेंस्कीसँ भेंट कयने छलथि।
४ जूनकेँ राष्ट्रपति वोलोडिमिर जेलेंस्की आम चुनावमे लगातार तेसर जीतक लेल प्रधानमंत्री नरेन्द्र मोदीकेँ बधाई देलनि, संगहि राष्ट्रपति हुनका अपन देश अयबाक लेल आमंत्रित सेहो कयलनि।
मार्चमे वोलोडिमिर जेलेंस्कीक सङ्ग फोन पर भेल बातचीतमे प्रधानमंत्री नरेन्द्र मोदी भारत-यूक्रेन साझेदारीकेँ मजबूत करबाक तरीका पर चर्चा कयने छलथि।
प्रधानमंत्री मोदी राष्ट्रपति जेलेंस्कीकेँ आश्वासन देने छलाह जे भारत शांतिपूर्ण समाधानक समर्थन करबाक लेल अपन क्षमताक अनुसार सब किछु करैत रहत।
प्रधानमंत्री मोदी एहि मासक आरम्भमे अपन दू दिवसीय मास्को यात्राक क्रममे कहने छलथि, “युद्धक मैदानमे कोनो समस्याक समाधान नहिं अछि। संवाद आ कूटनीति आगू बढ़बाक रास्ता अछि।”
मोदी इहो कहलनि जे भारत सदैव क्षेत्रीय अखंडता आ संप्रभुता सहित संयुक्त राष्ट्र चार्टरक सम्मानक आह्वान कयलक अछि।
