केजरीवालक अतिरिक्त पूर्व उपमुख्यमंत्री मनीष सिसोदिया आ बीआरएस नेता के. कविता सेहो वीडियो कॉन्फ्रेंसिंगक माध्यमसँ अदालतमे उपस्थित भेलैथ। राउज एवेन्यू कोर्ट मनीष सिसोदियाक न्यायिक हिरासतकेँ ३१ जुलाई आ के. कविताक न्यायिक हिरासतकेँ ३१ जुलाई धरि बढ़ा देलक अछि।
एहिसँ पहिने १२ जुलाईकेँ अदालत आबकारी नीतिसँ जुड़ल भ्रष्टाचारक मामिलामे मुख्यमंत्री अरविन्द केजरीवालक न्यायिक हिरासतकेँ २५ जुलाई धरि बढ़ा देने छल, जकर जाँच सीबीआई कऽ रहल अछि।
केजरीवालकेँ वीडियो कॉन्फ्रेंसिंगक माध्यमसँ विशेष न्यायाधीश कावेरी बावेजाक समक्ष पेश कयल गेल। ओ अपन न्यायिक हिरासतक अवधि समाप्त भेलापर केन्द्रीय अन्वेषण ब्यूरो (सीबीआई) आ प्रवर्तन निदेशालय (ईडी)क मामिलामे उपस्थित भेल छलाह।
दोसर दिसि, दिल्ली उच्च न्यायालय आबकारी नीति मामिलासँ जुड़ल भ्रष्टाचारक मामिलामे केन्द्रीय अन्वेषण ब्यूरो (सीबीआई) द्वारा हुनक गिरफ्तारीकेँ चुनौती देबयवला मुख्यमंत्री अरविन्द केजरीवाल द्वारा दायर याचिका पर १७ जुलाईकेँ अपन आदेश सुरक्षित राखि लेलक।
केजरीवाल अपन गिरफ्तारीकेँ अवैध बतौलनि अछि। संगहि सीबीआई कहलक जे पूरा सबूत अयलाक बादे कानूनक तहत गिरफ्तारी कयल गेल। न्यायमूर्ति नीना बंसल कृष्णा सेहो केजरीवालक अंतरिम जमानत याचिका पर आदेश सुरक्षित राखि लेलनि।
