हरियाणा विधानसभा चुनावक लेल मतदान प्रक्रिया प्रायः पुरा भेल। ५ बजे धरि राज्यमे ६१% मतदान भेल छल। मतदाता सभ ९० विधानसभा सीटपर अपन मताधिकारक प्रयोग कऽ रहल छलथि। ओना, नारनौंद विधानसभा क्षेत्रसँ भाजपा आ कांग्रेस कार्यकर्तासभक बीच झड़पक समाचार भेटल, जाहिसँ वातावरण तनावपूर्ण भऽ गेल।
हरियाणाक मुख्यमंत्री आ लाडवा विधानसभा सीटसँ भाजपा उम्मीदवार नायब सिंह सैनी कहलनि, “हम राज्यक जनतासँ कहय चाहब जे शत प्रतिशत मतदान करू। पिछला १९ सालमे प्रधानमंत्री मोदी आ डबल इंजन सरकार जाहि गतिसँ काज कयलक अछि, हम आबय वाला समयमे आओर तेजीसँ काज करब। हम राज्यक जनतासँ कहय चाहब जे राज्यक विकासक लेल खुलि कऽ मतदान करू। विकासक गारंटी अछि ‘मोदीक गारंटी’, कांग्रेसक कोनो गारंटी नहिं अछि। कांग्रेसक दावा निराधार अछि, ओ लोकक विश्वास गमा चुकल अछि।
केंद्रीय मंत्री मनोहर लाल खट्टर कहलनि, “ओ (कांग्रेस) एखन धरि अपन मुख्यमंत्रीक चेहरा घोषित नहिं कऽ सकल अछि, हम मुख्यमंत्रीक चेहरा घोषित कऽ देने छी, हुनकर (कांग्रेस) समयमे भ्रष्टाचार व्याप्त छल। पछिला १० सालमे हरियाणामे औद्योगिक विकास भेल अछि, सबकेँ काज भेटल अछि।
कांग्रेस सांसद कुमारी शैलजा कहलनि, “हमर पार्टी तय करैत अछि, इ हमर परंपरा अछि। आइ हरियाणाक भाग्य बदलि जाएत। आइ एकतरफा मुकाबला अछि आ लोक एकरा देखा रहल अछि। कांग्रेस पार्टी आ हम नीति आ नेतृत्व पर मजबूत छी। हम राज्यक सभ ९० सीट जीतबाक लेल लड़ि रहल छी।
तोशामसँ कांग्रेसक उम्मीदवार अनिरुद्ध चौधरी कहलनि, “बहुत नीक माहौल अछि, कांग्रेस पार्टीक सरकार आबि रहल अछि। कांग्रेस पार्टीकेँ जितयबाक लेल लोक मन बना लेलक अछि। कांग्रेस पार्टी सरकार बनाबय जा रहल अछि आ तोशामसँ कांग्रेस जीतत।
