प्रधानमंत्री नरेन्द्र मोदी अक्टूबर २०२२ मे ५जी सेवाक शुभारंभ कयलनि। तहियासँ भारतमे ५जी उपयोगकर्ता ४जीक तुलनामे लगभग ३.६ गुना बेसी मोबाइल डेटाक उपयोग कऽ रहल छथि।
बुधदिन जारी एकटा रिपोर्टक अनुसार, २०२३ मे प्रति उपयोगकर्ता औसत मासिक डेटा ट्रैफिक साल-दर-साल २४ प्रतिशत बढ़ल, जे प्रति यूजर प्रति माह २४.१ गीगाबाइट धरि पहुँचि गेल।
भारतमे ५जी डिवाइस इकोसिस्टम तेजीसँ विकसित भऽ रहल अछि। देशक ७९.६ करोड़ स्मार्टफोनमे १७ प्रतिशत अर्थात लगभग १ करोड़ ३४ लाख ५जी उपकरणक हिस्सेदारी अछि।
२०२३ मे, उपयोगकर्तासभ पछिला पाँच सालमे २६ प्रतिशतक सीएजीआरक सङ्ग प्रति मास १७.४ एक्साबाइटक उपभोग कयलनि। निष्कर्षक अनुसार, ५जीक लाॅन्च डेटा उपयोगमे वृद्धिक मुख्य स्रोतक रूपमे उभरल अछि, जे २०२३ मे सभ डेटा ट्रैफिकमे १५ प्रतिशतक योगदान देत।
नोकिया (भारत)क मोबाइल नेटवर्क बिजनेसक प्रमुख तरुण छाबड़ा कहलनि, “पूरा भारतमे ५जी तकनीकीक अविश्वसनीय प्रसार आ सुपर-फास्ट ५जी डेटा स्पीडक बढ़ैत माँग स्पष्ट अछि।”
५जी ट्रैफिक सभ दूरसंचार क्षेत्रमे पर्याप्त वृद्धि देखलक अछि। जाहिमे मेट्रो सर्किल एहि मामिलामे आगाँ अछि आ कुल मोबाइल डेटा ट्रैफिकमे २० प्रतिशत हिस्सेदारी धरि पहुँचि गेल अछि।
रिपोर्टक अनुसार, एडवांस ५जी उपलब्धता आ प्रदर्शन, किफायती उपकरणक विस्तृत श्रृंखलाक उपलब्धता, सङ्गहि नव डेटा-गहन ऐप आ सेवाक शुरुआतसँ भविष्यमे ५जी विकासमे तेजी आओत।
रिपोर्टक अनुसार, ५जी फिक्स्ड वायरलेस एक्सेस (एफडब्ल्यूए)क उदय घर आ व्यवसाय दुनूमे नव सेवाक लेल काज करत, जाहिमे एफडब्ल्यूए उपयोगकर्ताकेँ औसत ५जी उपयोगकर्ताक तुलनामे अनुमानित २.५ गुना बेसी डेटाक उपयोग करबाक अपेक्षा अछि।
