पूर्णियाक तनिष्क शोरूममे भेल डकैतीक घटनामे पुलिस आ एसटीएफक संयुक्त टीम पाँचटा आरोपीकेँ गिरफ्तार कयलक अछि। ई डकैती २६ जुलाई, २०२४ केँ भेल छल, जाहिमे शोरूमसँ करोड़ो टाका लूटल गेल छल। पुलिस सीसीटीवी फुटेज आ तकनीकी साक्ष्यक आधार पर एहि घटनामे शामिल सभटा आरोपीकेँ गिरफ्तार कयलक अछि। पुलिस सभ आरोपीसँ पूछताछमे लागल अछि।
पूर्णियाक तनिष्क शोरूममे अपराधी सभ दिनदहाड़े हथियारक बाल पर ई घटनाकेँ अंजाम देने छल। जकर बाद प्रशासन एहि मामिलामे तत्काल कारवाई कयलक आ घटनाक जाँच आ आरोपीकेँ पकड़बाक लेल कतेको टीमक गठन कयलक, जाहिमे एसटीएफक महत्वपूर्ण भूमिका छल। अपराधीसभक गिरफ्तारीक लेल सीसीटीवी फुटेज आ साक्ष्यक गहन जाँच कयल गेल आ एकर आधार पर अलग-अलग स्थानसँ पाँचटा अभियुक्तकेँ गिरफ्तार कयल गेल अछि।
गिरफ्तार अपराधीसभक पहिचान प्रशांत गौरव उर्फ राजकुमार, सोनू झा, बिट्टू कुमार पासवान, अंकुश कुमार आ शम्मी आनन्दक रूपमे भेल अछि। गिरफ्तार कयल गेल अभियुक्तमेसँ एक शम्मी आनन्द एहि डकैतीमे आर्थिक सहायता कयने छल। डकैतीक बाद ओ आरोपीकेँ पाइ उपलब्ध करओने छल। पूर्णिया पुलिसकेँ एहि अपराधीसभकेँ गिरफ्तार करबामे मुजफ्फरपुर आ रोहतास पुलिसक सहायता सेहो भेटल। पुलिस कहलक जे घटनाक बाद अपराधी सभ विभिन्न ठाम शरण लेने छल।
पुलिसक अनुसार सभ आरोपीसँ पूछताछ चलि रहल अछि आ एहि डकैतीसँ जुड़ल अन्य पहलूक सेहो जाँच कयल जा रहल अछि। बरामदगीमे कतेको मोबाइल आ बैंकक चेक बुक शामिल अछि, जे आरोपीसँ जब्त कयल गेल अछि।
