बेनीपट्टीमे पोखरिमे नहाईत काल ३ भाई-बहिन डूबि गेल, परिवारमे कय रहल चित्कार

बेनीपट्टी समदिया
*

मधुबनीक बेनीपट्टी प्रखंडक धनौजा गामक मटकोरवा पोखरिमे बृहस्पति दिन स्नान करैत काल तीनटा बच्चाक डूबि कय मृत्यु भऽ गेलैक। मृतकक पहिचान खुशबू कुमारी (१०), अंकित कुमार (८) आ हुनकर पितियौत बहिन दुर्गा कुमारी (१२) केर रूपमे भेल अछि। पुलिस शव केर पोस्टमार्टमक लेल मधुबनी भेज देलक अछि। पोखरिक पानिमे डूबि एके परिवारक तीनटा बच्चाक मृत्युक घटनाक बाद धनौजा गाममे शोक पसरल अछि। धनौजा गामक दिवेश मंडलक बेटी दुर्गा कुमारी, मोहन मंडलक बेटी खुशबू आ बेटा अंकित कुमार पितियौत बहिन दुर्गाक संग घर छोड़ि मटकोरवा पोखरिमे एक सङ्ग स्नान करबाक लेल चलि गेल। स्नानक क्रममे तीनू गोटे अतिरिक्त पानिमे चलि गेल, जाहिसँ तीनू बच्चा पोखरिक पानिमे डूबि गेल। पोखरि लग ठाढ़ दूटा बच्चा तीनू बच्चाकेँ पानिमे डूबैत देखि शोर मचाबय लागल। पोखरिमे बच्चा सभक डूबबाक खबरि पर गामक लोक पोखरिमे घुसि खोज शुरू कऽ देलक। बहुत प्रयासक बाद मटकोरवा पोखरिक पानिसँ दुर्गा कुमारी, अंकित कुमार आ खुशबू कुमारीकेँ बाहर आनल गेल। तीनू बच्चाकेँ इलाजक लेल अनुविभागीय अस्पताल बेनीपट्टी आनल गेल, जतय चिकित्सक हुनका मृत घोषित कऽ देलनि। तीनटा बच्चाक मृत्युक बाद माय रेणु देवी आ पिंकी देवी चित्कार कय रहल छथि। अंकित चारि भाई-बहिन छल, जाहिमे एकटा भाय अंकित आ बहिन खुशबूक पानिमे डूबि कऽ मृत्यु भऽ गेल अछि। दुर्गा कुमारी चारि भाई-बहिनमे दोसर नंबर छलीह। धनौजा गामसँ आधा किलोमीटर पूरब चौरीमे मटकोरवा पोखरि अछि। बेटा-बेटीक मृत्युक समाचार सुनि माता-पिताक आँखिसँ नोर नहिं रुकि रहल अछि।