बिहार मतदाता सूची संशोधनक निर्णायक चरणमे पहुंचला पर राज्यक चुनाव मशीनरी सब राजनीतिक दलक प्रतिनिधिसॅं भेंट कयलक अछि।
बिहारमे मतदाता सूचीक विशेष गहन संशोधन (एसआईआर) केर काज चलि रहल अछि। एखनि धरि 29.62 लाख मतदाता फॉर्म नहि जमा कयने छथि। एसआईआर केर निर्णायक चरणमे प्रवेशक संग राज्य केर चुनाव मशीनरी सब राजनीतिक दलक प्रतिनिधिसॅं भेंट कय चुकल अछि। 29.62 लाख लोकक सूची जे फॉर्म जमा नहि कयने छथि आ करीब 43.93 लाख लोक जे देल गेल पता पर नहि भेटल छल, हुनकर सूची हुनका सभसॅं साझा कएल गेल अछि।
सब 12टा पैघ राजनीतिक दलसॅं आग्रह कयल गेल अछि जे ओ अपन जिला अध्यक्ष आ दल द्वारा नियुक्त करीब डेढ़ लाख बूथ स्तरक एजेंटक माध्यमसॅं एहि शेष मतदातासॅं संपर्क करथि। चुनाव आयोग सोमदिन कहलक जे, “ई सुनिश्चित करबाक अछि जे राजनीतिक दल सहित पूरा चुनाव मशीनरी मिशन मोडमे एक संग काज करय ताकि कोनो पात्र मतदाता बाहर नहि रहय। मतदाता सूचीक मसौदा 1 अगस्तकेँ प्रकाशित कयल जाएत।”
दोसर दिसि चुनाव आयोग सोमदिन (21 जुलाई 2025) कहलक जे बिहार देशक पहिल राज्य बनि गेल अछि जतय सब मतदान केंद्र पर 1200 सॅं कम मतदाता अछि। आयोग हालमे मतदानक दिन मतदान केंद्र पर मतदाताक कतार छोट करय केर प्रयास कयलक अछि। एकर तहत प्रत्येक मतदान केंद्र पर मतदाताक संख्या 1500 सॅं घटा कए अधिकतम 1200 करबाक प्रावधान अछि।
चुनाव आयोगक कहनाय अछि जे बिहारमे मतदाताकें लंबा कतारसॅं बचय लेल 12,817 नव मतदान केंद्र बनाओल गेल अछि। राज्यमे मतदान केंद्रक कुल संख्या 77,895 सॅं बढ़ि कए 90,712 भ गेल अछि। मतदान केंद्र पर मतदाताक संख्या कम करय केर एहने प्रयास (जेकरा निर्वाचन आयोग के शब्दावलीमे युक्तिकरण कहल जाइत अछि) सब राज्य आ केंद्र शासित प्रदेशमे कयल जायत।
चुनाव आयोग एहि बात पर काज कय रहल अछि जे, जतेक संभव होए, मतदाताकें मतदान केंद्र धरि पहुंचय लेल दू किलोमीटरसॅं बेसि केर यात्रा नहि करय पड़य। चुनावमे मतदाताक अधिकतम भागीदारी सुनिश्चित करय लेल ऊँच भवन आओर सोसाइटीमे मतदान केंद्र सेहो बनाओल गेल अछि।
