अमेरिका, चीन, ब्रिटेन, रूससँ आयल शुभकामना
*
नई दिल्ली
*
बुधकेँ १७म लोकसभा भंग भेल। प्रधानमंत्री नरेन्द्र मोदी केन्द्रीय मंत्रिपरिषदक संग राष्ट्रपति द्रौपदी मुर्मूकेँ अपन इस्तीफा सौंपि देलनि। राष्ट्रपति भवनक अनुसार, “राष्ट्रपति इस्तीफा स्वीकार कऽ लेलनि आ प्रधानमंत्री आ केन्द्रीय मंत्रिपरिषदसँ नव सरकारक गठन होयबा धरि पद पर बनल रहबाक अनुरोध कयलनि।
मोदी राजग केर संसदीय दलक नेता सर्वसम्मति सँ चुनल गेलाह। नरेन्द्र मोदी राजगक एही बैसारक बाद आब सरकार बनयबाक दावा पेश करताह। एही बैसारमे सब घटक दलक नेता उपस्थिति छलाह।
ओतय इंडी गठबंधनक बैसार सेहो समाप्त भेल, मल्लिकार्जुन खड़गे इंडी गठबंधनक बैसारक बाद कहला जे सबके बधाई, बीजेपी केर नैतिक हार अछि, मुदा संवैधानिक व्यवस्थामे विश्वास अछि, स्वागत।
एहि जीतक लेल आ पुनः सरकार गठनक लेल देश-विदेशसँ बधाई आदि रहल अछि। अमेरिका, चीन, ब्रिटेन, रूस आ अन्य देशसँ मोदीकेँ जीतक बधाई आयल।
लोकसभा चुनावक परिणाम पर एनडीए तेसर बेर सरकार बनेबाक दावा पेश करत, परिणामकेँ दुनियाक सबसँ पैघ लोकतंत्रक जीत कहैत – पीएम मोदी कहलनि, “जीतब आ हारब राजनीतिक हिस्सा अछि। संख्याक खेल चलैत रहत।
चंद्रबाबू नायडू कहला जे सब संग चुनाव लड़लौ ताहि लेल ककरो शक नहीं होय, नरेंद्र मोदी प्रधानमंत्री रहताह।
सोशल मीडिया साइट एक्स पर गिरिराज सिंह लिखलाह जे ३०३ सांसदक संग सरकार बनेबाक दावा पेश करत राजग। इंडिपिंडेंट कैंडिडेट सेहो बीजेपीमे शामिल होयत।
राजगक घटक दल जदयू, लोजपा, टीडीपी, जद(एस) सहित शिवसेना आ राष्ट्रवादी कांग्रेस पार्टी (एनसीपी) एहि बैसारमे शामिल छल आ नरेन्द्र मोदीक नेतृत्वमे केन्द्रमे सरकार बनेबाक लेल अपन समर्थन देलक अछि। महाराष्ट्रमे शिवसेना सात सीट आ एनसीपीकेँ एकटा सीट भेटल अछि।
तेलुगु देशम पार्टी (टीडीपी) भाजपाक बाद पार्टीक दोसर सबसँ पैघ घटक अछि। ओकर वरिष्ठ नेता कनकमेडला रविन्द्र कुमार कहलनि, “आंध्र प्रदेशमे भाजपा आ जन सेनाक सङ्ग चुनाव पूर्व हमर समझौता मात्र राजनीतिक अंकगणितीय सौदा नहिं अछि, बल्कि विश्वसनीयताक बंधन अछि। दोसर दिस टीडीपी प्रमुख एन चंद्रबाबू नायडू राजगक बैसारमे शामिल भेलाह।
जनता दल यूनाइटेड (जेडीयू) केर महासचिव केसी त्यागी कहलनि कि हम जनादेशक सम्मान करैत छी। बिहारक मुख्यमंत्री नीतीश कुमार विपक्षी इंडी गठबंधनक संस्थापकमेसँ एक छथि। एहेन स्थितिमे अनुमान लगाओल जा रहल छल जे ओ विपक्षी गठबन्धनमे फेरसँ शामिल भऽ सकैत छथि। अटकलबाजी पर विराम दैत त्यागी कहलनि जे जनताक फैसला सर्वोपरि अछि। जेडीयू राजगमे रहि भाजपाक सङ्ग चुनाव लड़लक अछि आ केन्द्रमे नरेन्द्र मोदीक नेतृत्वमे तेसर बेर एनडीए सरकारक गठन होयत।
लोक जनशक्ति पार्टी-रामविलास प्रमुख चिराग पासवान सेहो कहने छलाह जे ओ कोनो परिस्थितिमे एनडीए नहिं छोड़ताह आ बुधदिन दिल्लीमे होबयवला राजगक बैसारमे भाग लेताह। कहलनि, “हम नरेन्द्र मोदीकेँ बधाई देबय चाहैत छी जे ओ देशक अगिला प्रधानमंत्री बनताह। हुनक नेतृत्वमे एनडीए तेसर बेर केन्द्रमे सरकार बनाबय जा रहल अछि। एनडीएक तेसर कार्यकाल देशकेँ नव ऊँचाइ पर लऽ जायत, जकर वादा ओ देशसँ कयने छथि। ई सरकार विकाससँ जुड़ल सभ वादा पूरा करत। हमर पार्टी आ हमर सांसद एनडीए सरकारक समर्थन करत।’
नव सरकारक शपथ ग्रहण समारोहक तैयारी राष्ट्रपति भवनमे शुरू भऽ गेल अछि। परम्पराक अनुसार मोदी बृहस्पति दिन नव सरकारक गठनक दावा पेश कऽ सकैत छथि। राष्ट्रपति द्रौपदी मुर्मू, जे सबसँ पैघ पार्टी छथि, हुनका आमंत्रित करतीह।
