शुक्रदिन निर्मली थाना परिसरमे २६ अलग-अलग मामिलामे जब्त लगभग १६०० लीटर देसी आ विदेशी शराब नष्ट कऽ देल गेल। ई कारवाई दंडाधिकारी सह निर्मली सीओ विजय प्रताप सिंहक नेतृत्वमे कयल गेल। जब्त कयल गेल शराबक बोतल आ बीयरक डिब्बा बुलडोजर चलाकऽ नष्ट कऽ देल गेल। थाना परिसरमे ई कारवाई देखबा लेल पैघ संख्यामे स्थानीय लोक जमा भेल।
प्रशासन शराबबंदी कानूनकेँ सख्तीसँ लागू करय आ अवैध शराब व्यापार पर अंकुश लगाबय केर उद्देश्यसँ ई डेग उठौलक। नष्ट भेल शराबकेँ पहिने गिनल गेल छल आ चिन्हित कयल गेल छल, फेर बुलडोजरक सहायतासँ तोड़ल गेल । एहि मौका पर निर्मली थाना प्रभारी सियावर मंडल, पुलिस निरीक्षक वशिष्ठ मुनि राय, उत्पाद विभागक उपनिरीक्षक विष्णुदेव यादव, थानाक मुंशी दिलीप कुमार मंडल, चौकीदार शेखर मंडल, मनोज पासवान सहित भारी संख्यामे पुलिस बल आ प्रशासनिक अधिकारी उपस्थित छलाह।
अधिकारी सभ कहलनि जे शराबबंदी कानूनक उल्लंघन करयवलाक खिलाफ लगातार कारवाई कयल जा रहल अछि। प्रशासनिक कारवाई स्थानीय लोकसभकेँ ई सन्देश देबाक लेल कयल गेल अछि जे अवैध शराबक व्यवसायमे शामिल लोकसभकेँ कोनो परिस्थितिमे बख्शल नहि जायत।
मौका पर उपस्थित लोकसभ प्रशासनक सख्तीक सराहना कयलनि आ एहि निषेधकेँ प्रभावी बनयबाक सकारात्मक प्रयास बतौलनि। एहि तरहक कारवाई बिहार सरकारक पूर्ण शराबबंदी नीतिक सख्तीसँ कार्यान्वयनक हिस्सा अछि। अवैध शराबक उत्पादन आ बिक्री नियंत्रित करबाक लेल प्रशासन लगातार अभियान चला रहल अछि। नष्ट भेल शराबक बाजार मूल्य लाखो रुपया होयबाक अनुमान अछि। निर्मलीमे भेल ई कारवाई बिहार सरकारक शराबबंदी नीतिक प्रति प्रशासनक प्रतिबद्धताकेँ दर्शाबैत अछि।
