लेबनानमे इजरायली हवाई हमलासँ विस्थापित लोकक कुल संख्या लगभग १२ लाख धरि पहुँचि गेल अछि। लेबनानी मंत्रिपरिषदक आपदा जोखिम प्रबंधन इकाई एकटा रिपोर्टमे ई जानकारी देलक अछि।
बुधदिन जारी रिपोर्टक अनुसार, विस्थापित लोकसभ अपन परिवारक सङ्ग आन क्षेत्रमे रहबाक लेल विवश छथि। ओ सभ घर किराया पर लऽ रहल छथि या सार्वजनिक वा निजी जगह पर शरण लऽ रहल छथि। हजारो आन लोक सीरियामे प्रवेश कए चुकल अछि।
रिपोर्टक अनुसार २३ सितंबरसँ २९ सितम्बर धरि २,३४,०२३ सीरियाई आ ७६,२६९ लेबनानी नागरिक सीरियाक क्षेत्रमे प्रवेश कयलनि।
रिपोर्टमे कहल गेल अछि जे लेबनानमे विस्थापित लोकसभकेँ रखबाक लेल ८६७ केन्द्र स्थापित कयल गेल अछि, जाहिमे सँ ६४३ अपन अधिकतम क्षमता धरि पहुँचि गेल अछि।
इजरायली आक्रमण दक्षिणी आ पूर्वी लेबनानक सङ्ग-सङ्ग बेरूतक दक्षिणी उपनगरक लोकसभकेँ अपन घर छोड़ि सुरक्षित क्षेत्रमे शरण लेबाक लेल विवश कऽ देलक।
एम्हर मिस्रक प्रधानमन्त्री मुस्तफा मदबौली चेतौनी देलनि जे इजरायलक एकतरफा कारवाई मध्य पूर्वमे व्यापक क्षेत्रीय युद्ध शुरू कऽ सकैत अछि। ओ क्षेत्रीय सुरक्षा आ स्थिरता बनाकऽ रखबाक लेल तत्काल युद्धविरामक लेल अंतर्राष्ट्रीय समुदाय आ प्रभावशाली शक्तिसभक हस्तक्षेपक माँग कयलनि।
२३ सितंबरसँ इजरायल लेबनानमे हवाई हमला तेज कऽ देलक। हुनकर कहब छनि जे ई कारवाई लेबनानी संगठन हिजबुल्लाहकेँ समाप्त करबाक लेल कयल जा रहल अछि।
पछिला शुक्रदिन बेरूतक दक्षिणी उपनगरमे एकटा महत्वपूर्ण हमलामे हिजबुल्लाहक प्रमुख हसन नसरुल्लाह आ हुनक कतेको सहयोगी मारल गेल छल। एहि सप्ताहक आरम्भमे इजरायल दक्षिण लेबनानमे जमीनी सैन्य अभियान शुरू कयलक।
८ अक्टूबर, २०२३केँ हिजबुल्लाह हमासक सङ्ग एकजुटता व्यक्त करैत गाजामे इजरायल पर रॉकेट दागब शुरू कयलक। नवीनतम घटनाक्रम एहि संघर्षक विस्तार अछि।
