२०२५क विधानसभा चुनावसँ पहिने बिहारमे कानून-व्यवस्थाक स्थिति बिगड़ि रहल अछि। होलीक अवसर पर राज्यक अलग-अलग जिलामे पुलिसकर्मी आ अन्य सुरक्षा बलक जवान पर हमलाक कतेको घटनाक सूचना भेटल अछि। एहि हमलामे दूटा एएसआई सेहो मारल गेल। कतेको आउर सैनिक घायल भेल अछि।
सोमदिन किशनगंजमे गामक लोक एसएसबीक जवानसभकेँ बंधक बना कऽ पीटलक। एहि हमलामे चारिटा सैनिक घायल भेल। किशनगंजक एडीजी कहलनि जे ओ गोली नहि चलाबय चाहैत छथि, मुदा जँ कोनो घातक हमला होइत अछि तँ ओ गोली चला सकैत छथि।
होलीक लगपास बिहारमे पुलिस पर हमलाक कुल १२ टा घटना सामने आयल अछि। एहि घटनासभमे दूटा एएसआई मारल गेल अछि आ २७ पुलिसकर्मीक घायल होयबाक सूचना अछि।
एसएसबीक १९म बटालियनक कर्मीकेँ एकटा नकली नोट डीलरक सूचना भेटल छल, जकर बाद ओ तस्करक पीछा कऽ रहल छल। एहि दौरान १९म बटालियनक सैनिक उक्त तस्करकेँ नगर थाना क्षेत्रक बेलवा चौक पर पकड़ि लेलक, मुदा तस्कर ई कहैत हल्ला करय लागल जे ओकर अपहरण कयल जा रहल अछि। एकर बाद गामक लोक आ अनियंत्रित भीड़ घटनास्थल पर जमा भऽ गेल, सैनिकसभकेँ घेरि लेलक आ हमला करैत हुनका सभकेँ बंधक बना लेलक। हमलामे चारिटा सैनिक घायल भऽ गेलाह। घटनाक सूचना भेटलाक बाद नगर पुलिस थानाक प्रमुख अभिषेक कुमार रंजन एकटा टीमक संग घटनास्थल पर पहुँचलाह आ काफी प्रयासक बाद सैनिकसभकेँ बचायबामे सफल रहलाह। सैनिकसभकेँ सदर पुलिस स्टेशन आनल गेल। पुलिस आगूक कार्यवाहीमे लागल अछि। एसडीपीओ गौतम कुमार कहलनि जे जांच चलि रहल अछि आ जिम्मेदार लोककेँ गिरफ्तार कयल जायत।
एडीजी (मुख्यालय) कुंदन कृष्णन आ एडीजी (कानून व्यवस्था) पंकज दरद कहलनि जे १०टा मामिला अछि जाहिमे पुलिसपर हमला कयल गेल अछि। एहिमेसँ २टा घटना बहुत गम्भीर अछि। अररियामे पुलिस एकटा अपराधीकेँ पकड़बा लेल गेल। ओतय झगड़ाक क्रममे एकटा एएसआई खसि पड़ल आ माथमे चोट लागल। दोसर घटना मुंगेरमे भेल। दुनू घटना बहुत दुर्भाग्यपूर्ण अछि। आन ठाम दंगा करयवलाक संख्या बेसी छल। पाबनि-तिहारक समय हम संयम राखैत छी। हम गोली नहि चलाबए चाहैत छी। सब जगह कार्यवाही कयल गेल अछि आ एहिमे सम्मिलित केकरो बख्शल नहि जायत। जँ बल पर हमला होइत अछि तँ हम सभ पहिने हवामे गोली चलबैत छी आ जँ हमरासभ पर जानलेवा हमला होइत अछि तँ हमसभ जवाबी गोलीबारी सेहो कऽ सकैत छी।
एडीजी बतौलनि जे होलीक लगपासक सभ कॉलक प्रतिक्रियाक समय लगभग १४ मिनट छल। एहि अवधिमे बिहारमे कोनो पैघ साम्प्रदायिक दंगा नहि भेल।
होलीक लगपास बिहारमे पुलिस पर हमलाक कुल १२ घटना भेल। एहि घटनासभमे २टा एएसआई शहीद भेल आ २७ पुलिसकर्मी घायल हेबाक सूचना अछि। एहि साल होलीक दौरान कुल ११टा सामान्य घटना भेल अछि। कतहु कानून-व्यवस्थाक कोनो गंभीर समस्या नहि भेल। कुल 11 मामिला दर्ज भेल। एहि घटनासभमे कुल १४ गोटे घायल भऽ गेलाह। कियो मारल नहि गेल। एखनि धरि 29 गोटेकेँ गिरफ्तार कएल जा चुकल अछि। 4 केँ हिरासतमे लेल गेल अछि। एक्कहि समुदायक दूटा जातिक बीच दूटा घटना भेल, जाहिमे २६ गोटे घायल भऽ गेल। एखनि धरि 3 गोटेकेँ हिरासतमे लेल गेल अछि।
१४ मार्चकेँ कुल ६७,१८८ कॉल आयल आ १३,१५० घटना भेल। औसतन, पुलिसकेँ प्रत्येक कॉलक जवाब देबामे १४ मिनट ३४ सेकण्ड लगैत छल। एम्हर १५ मार्चकेँ आपातकालीन नम्बर ११२ पर ५६,८५१ कॉल आयल आ ९,७४४ घटना भेल। एहि दिन कॉलक लेल औसत प्रतिक्रिया समय १४ मिनट ५२ सेकण्ड रहल।
