होर्मुजमे व्यावसायिक जहाज पर हमला, 11 भारतीय नाविक घायल

भारत कएलक कड़ा निंदा, वाणिज्यिक जहाज आ नाविक पर हमला तत्काल रोकबाक मांग

नई दिल्ली। होर्मुज समदिया

जलडमरूमध्यमे पनामा झंडावाला व्यावसायिक जहाज एमटी ऑन पीस पर भेल हमलाक भारत कड़ा निंदा कएलक अछि। ओमानक तट लग भेल एहि घटनामे जहाजक 19 सदस्यीय चालक दलमे सँ 12 गोटे घायल भेलाह, जाहिमे 11 भारतीय नागरिक छथि। विदेश मंत्रालय कहलक जे जहाज जलडमरूमध्यसँ गुजरैत काल एकटा प्रोजेक्टाइलक निशाना बनल।

हमलाक बाद सभ घायल नाविककेँ सुरक्षित निकालि ओमानक खसब लऽ जाओल गेल, जतय हुनकर उपचार चलि रहल अछि। चालक दलमे कुल 17 भारतीय नागरिक छलाह। भारत घायल नाविक सभकेँ सुरक्षित निकालब आ चिकित्सा सुविधा उपलब्ध करयबामे सहयोग लेल ओमानी अधिकारी सभक आभार व्यक्त कएलक अछि।

विदेश मंत्रालय क्षेत्रमे व्यावसायिक जहाज, नाविक आ नागरिक आधारभूत संरचना पर भऽ रहल हमलाक प्रति गंभीर चिंता व्यक्त करैत कहलनि जे एहि तरहक घटना क्षेत्रीय शांति आ स्थिरताक लेल गंभीर खतरा अछि। भारत सुरक्षित अंतरराष्ट्रीय नौवहन आ व्यापारक तत्काल बहालीक लेल एहेन हमला रोकबाक मांग कएलक अछि।

दोसर जहाजकेँ सेहो लौटबाक चेतावनी

घटनाक बीच यूनाइटेड किंगडम मैरीटाइम ट्रेड ऑपरेशंस (UKMTO) एकटा दोसर व्यावसायिक टैंकरक संबंधमे जानकारी देने अछि। रिपोर्टक अनुसार, होर्मुज जलडमरूमध्यसँ गुजरैत टैंकरकेँ ईरानक इस्लामिक रिवोल्यूशनरी गार्ड कॉर्प्स (IRGC) केर तरफसँ रेडियो पर चेतावनी देल गेल जे वापस नहि घुमल तँ निशाना बनाओल जा सकैत अछि। जहाजक मास्टर निर्देश मानि अपन मार्ग बदलि देलनि। UKMTO क्षेत्रसँ गुजरयवला जहाज सभकेँ सतर्क रहबाक सलाह देलक अछि।

जयशंकर सेहो जता चुकल छथि चिंता

विदेश मंत्री एस. जयशंकर संयुक्त राष्ट्र महासभामे सेहो समुद्री मार्गक सुरक्षा पर चिंता व्यक्त कएने छलाह। हुनकर कहब छल जे खाड़ी, लाल सागर आ काला सागरमे व्यावसायिक जहाज आ नाविक पर हमला गंभीर चिंता विषय अछि। हुनका अनुसार, एहेन घटनामे भारतीय नाविक समेत विभिन्न देशक लोकक जान गेल अछि, जे पूर्णतः अस्वीकार्य अछि। जयशंकर अंतरराष्ट्रीय कानूनक पालन, संयम आ तनाव कम करबाक आह्वान करैत जहाज आ नाविकक सुरक्षाकेँ सर्वोच्च प्राथमिकता देबाक बात कहलनि।