वैश्विक तनावसँ शेयर बाजारमे भारी गिरावट, सेंसेक्स 1,124 अंक लुढ़कल

निफ्टीमे 1.56 प्रतिशतक गिरावट, तेलक बढ़ल दामसँ निवेशकक चिंता बढ़ल

मुंबई । समदिया

भू-राजनीतिक तनाव, वैश्विक आर्थिक अनिश्चितता आ कच्चा तेलक बढ़ैत दामक बीच सोमदिन भारतीय शेयर बाजारमे भारी गिरावट देखल गेल। बीएसई सेंसेक्स 1,124.02 अंक अर्थात् 1.52 प्रतिशत घटि 72,771.72 अंक पर बंद भेल। ओतहि निफ्टी-50 360.25 अंक अर्थात् 1.56 प्रतिशतक गिरावटक संग 22,780.25 अंक पर रहल।

कारोबारक दौरान सेंसेक्स 1,179.51 अंकक गिरावटक संग 72,716.23 अंकक निचला स्तर धरि पहुँचल। निफ्टी सेहो 22,762.20 अंक धरि खसि गेल। व्यापक बाजारमे निफ्टी मिडकैप-100 1.63 प्रतिशत आ निफ्टी स्मॉलकैप-100 1.85 प्रतिशत घटल।

कच्चा तेलक बढ़ल कीमत आ अमेरिकी राष्ट्रपति डोनाल्ड ट्रम्प द्वारा ईरानक प्रस्ताव अस्वीकार करबाक बाद वैश्विक बॉन्ड यील्डमे बढ़ोतरीसँ निवेशकक भरोसा प्रभावित भेल। क्षेत्रवार निफ्टी पीएसयू बैंकमे सर्वाधिक गिरावट रहल। प्राइवेट बैंक आ बैंक निफ्टी सेहो कमजोर रहल, जखनिकि आईटी क्षेत्रमे तुलनात्मक रूपसँ कम गिरावट देखल गेल।

निफ्टी-50 मे डॉ. रेड्डीज लैबोरेटरीज, इन्फोसिस आ एचडीएफसी लाइफ छोड़ि अधिकांश शेयर लाल निशानमे रहल। टीएमपीवी, जियो फाइनेंशियल सर्विसेज, पावरग्रिड आ एलएंडटीक शेयरमे उल्लेखनीय गिरावट रहल।

बीएसईमे सूचीबद्ध कंपनी सभक कुल बाजार पूंजीकरण करीब 8 लाख करोड़ रुपया घटि 474 लाख करोड़ रुपया रहि गेल। पश्चिम एशियामे जारी तनावक कारण तेल आपूर्तिक चिंता बनल रहल। ब्रेंट क्रूड 2.2 प्रतिशत बढ़ि 106.6 डॉलर प्रति बैरल आ डब्ल्यूटीआई क्रूड 1.45 प्रतिशत बढ़ि 93.76 डॉलर प्रति बैरल पर पहुँचि गेल।

एशियाई बाजारमे सेहो दबाव रहल। दक्षिण कोरियाक सूचकांक करीब 2 प्रतिशत आ जापानक निक्केई 0.10 प्रतिशत घटल, जखनकि चीनक बाजारमे सेहो एक प्रतिशतसँ बेसी गिरावट दर्ज भेल। भारत तेलक प्रमुख आयातक देश हेबाक कारण कच्चा तेलक बढ़ल कीमतसँ महंगाई आ चालू खाता घाटा पर दबाव बढ़बाक आशंका बाजारक चिंता बढ़ौलक।