विजय सिन्हाक राहुल गांधी पर आक्रमण, कहलनि – जाति-धर्मक नहिं समाजक बात होए

कृषि क्षेत्रमे देलनि पैघ बदलावक संकेत, अधिकारीगण पर सख्त

गया । समदिया

बिहारक कृषि मंत्री आ भाजपा केर वरिष्ठ नेता विजय कुमार सिन्हा नेता प्रतिपक्ष राहुल गांधीक छात्र संवाद कार्यक्रम पर तीक्ष्ण कटाक्ष कयलनि अछि। ओ कहलनि जे युवा आ छात्रक नाम पर देशकेँ गुमराह करबाक राजनीति आब नहि चलत। जाति-धर्म आ लिंगक नाम पर समाजकेँ बाँटबाक प्रयासक विरोध करैत ओ कहलनि जे आब समाजकेँ जोड़बाक समय आबि गेल अछि।

विजय सिन्हा कहलनि जे विपक्षक कतेको नेताक जन्म ‘सोनाक चम्मच’ लऽ कऽ भेल छनि आ बिना विशेष कर्मक पैघ पद पर पहुँचि जाइत छथि। एहेन भाग्यशाली नेता समाजक वास्तविकता आ सामाजिक ताना-बानाकेँ नजदीकसँ नहि बुझि पाबैत छथि। एहेन लोक केवल मंच सजाकऽ सत्ता प्राप्तिक लेल उतावला रहैत छथि।

मंत्रीक अनुसार, भारत आब विकसित भारतक दिशामे तेजीसँ आगू बढ़ि रहल अछि। एहेन स्थितिमे तुष्टिकरणक राजनीति कऽ समाजकेँ तोड़बाक प्रयास करनिहार लोकक बात पर देश आब ध्यान नहि देत।

जाति आ धर्मक नाम पर समाज नहि बँटत

विजय सिन्हा जोर दऽ कऽ कहलनि जे देश आ प्रदेशकेँ जाति, धर्म अथवा लिंगक नाम पर नहि बाँटल जा सकैत अछि। प्रधानमंत्री नरेंद्र मोदी द्वारा बताओल गेल चारि प्रमुख वर्ग—गरीब, युवा, महिला आ किसान—केर हितमे विकासक नीति पर देश आगू बढ़ि रहल अछि।

ओ कहलनि, “देश आ प्रदेशकेँ जाति, धर्म वा लिंगक नाम पर नहि बाँटल जा सकैत अछि। समाजकेँ जोड़बाक समय आबि गेल अछि। आब समाजमे जातिक जहर घोरबाक राजनीति बंद हेबाक चाही। जनता आ विकासक बात हेबाक चाही आ ‘सबका साथ, सबका विकास’क नारा आगू बढ़त।”

बिहारक कृषि क्षेत्रमे पैघ बदलावक दावा

बिहारक कृषि व्यवस्थाक चर्चा करैत विजय सिन्हा कहलनि जे भाजपा-एनडीए सरकार तेज गतिसँ काज कऽ रहल अछि आ आगामी दिनमे कृषि क्षेत्रमे पैघ बदलाव देखबाक लेल भेटत। मगधक धरतीसँ ‘कृषि जनकल्याण संवाद’क शुरुआत कयल गेल अछि।

सरकार छोट किसानसभकेँ खेतसँ सीधा बजार धरि पहुँच उपलब्ध करएबा आ किसान उत्पादक संगठन (एफपीओ) केँ मजबूत करबाक दिशामे जोर दऽ रहल अछि, जाहिसँ छोट किसानसभकेँ अपन उपजक उचित मूल्य भेटि सकय।

छोट किसान आ भूमिहीन श्रमिक पर विशेष ध्यान

मंत्री कृषि मजदूरकेँ श्रमिकक दर्जा दैत कहलनि जे सरकारक मुख्य ध्यान श्रमिक उत्थान पर अछि। सामूहिक खेतीक माध्यमसँ 10 कट्ठा, एक बीघा अथवा डेढ़ बीघा धरि जमीन रखनिहार छोट किसान आ भूमिहीन श्रमिकसभकेँ प्राथमिकताक आधार पर सरकारी योजनाक लाभ देल जाएत।

ओ कहलनि जे सरकारक उद्देश्य किसानसभकेँ सीधा अधिकारीसभसँ बात करबाक अवसर देब आ हुनकर समस्या केर त्वरित समाधान करब अछि।

शिकायत भेटिते 24 घंटामे कार्रवाई

कृषि विभागमे पारदर्शिता आनबाक लेल विजय सिन्हा कड़ा रुख देखौलनि। ओ कहलनि जे बीज, खाद अथवा कोनो योजनासँ जुड़ल शिकायत प्रमाण, नाम आ स्थानक स्पष्ट जानकारीक संग भेटल तऽ 24 घंटाक भीतर कड़ी कार्रवाई कयल जाएत।

गडड़बड़ीक सूचना भेटिते जांच कमेटी गठित कऽ छापामारी कराओल जाएत। पंचायतसँ लऽ कऽ प्रदेश स्तर धरि अधिकारीसभकेँ शिकायतकर्ताक संग आमने-सामने बैसाकऽ मामिलाक समाधान करबाक व्यवस्था कयल जाएत।

15 दिनमे सुधारि लिअ अपन रवैया

विजय सिन्हा कहलनि जे जेना राजस्व विभागक व्यवस्थाकेँ सुधारबाक प्रयास भेल, तहिना आब कृषि विभागमे सेहो सुधारक अभियान चलाओल जा रहल अछि। शिकायत प्राप्त भेल अधिकारीसभकेँ अपन कार्यशैली सुधारबाक लेल 15 दिनक समय देल गेल अछि।

समय पर पूरा होएत विष्णुपद आ महाबोधि कॉरिडोर

गया जिलाक प्रभारी मंत्रीक रूपमे विजय सिन्हा विष्णुपद मंदिर आ महाबोधि कॉरिडोर परियोजनाक समीक्षाक जानकारी सेहो देलनि। ओ कहलनि जे मास्टर प्लान, निर्माण कार्य, यातायात प्रबंधन, तीर्थयात्रीसभक सुविधा आ फल्गु नदीक घाटसभक विकास पर कंसल्टेंटसभक संग लगातार चर्चा चलि रहल अछि।

विष्णुपद टेंपल कॉरिडोरक प्रस्तावित निर्मित क्षेत्र 88,340.28 वर्ग मीटर अछि आ एकर अनुमानित लागत लगभग 1,531.29 करोड़ रुपया अछि। मंत्री कहलनि जे दुनू परियोजनाक काज निर्धारित समय पर पूरा करबाक प्रयास कयल जाएत।