मैपुप्र केर मैथिली समाचार बुलेटिन आइ अपन 500 एपिसोड पूरा कयलक

एहि उपलब्धिक लेल सुमधुर आवाजक धनी समाचार वाचक सुमित सौरभ एवं बुलेटिनक संपादक मंडलकेँ अनेको चर्चित व्यक्तित्वक अभिनंदन एवं शुभकामना मैपुप्र केर प्राप्त भेल अछि।
निज समदिया!! ‘अपने देखि रहल छी ‘मैथिल पुनर्जागरण प्रकाश’ आजुक ताजा समाचारक संग उपस्थित छी हम सुमित सौरभ, प्रस्तुत अछि आजुक मुख्य समाचार’, “एहि उक्तिक मधुर आ साधल आवाजक आब प्रायः अधिकतर मिथिलावासी अभ्यस्त भऽ गेल छी। सुमित सौरभवक आवाजमे ‘मैथिल पुनर्जागरण प्रकाश’क ई लगातार समाचार बुलेटिन अपन 500 एपिसोड आइ मंगल, 08-09-2026 केँ पूरा कऽ मिथिला-मैथिलीक उपलब्धिक आकाशमे एकटा नव कीर्तिमानक सदृश अछि।” ई बात मैथिल पुनर्जागरण प्रकाशक मुख्य संपादक पंडित अजय नाथ झा शास्त्री कहलनि। ओ ‘उत्कृष्ट मैथिली समाचार वाचक’ सम्मानसँ सम्मानित सुमित सौरभकेँ एवं समाचार बुलेटिनक सम्पादक मंडलकेँ एहि सतत 500 एपिसोड पूरा होयबा पर हृदयसँ प्रशंसा करैत अशेष अभिनंदन प्रदान कयलनि अछि आ एहि यात्राक आगुक बुलेटिनक लेल शुभकामना व्यक्त कयलनि अछि।

अभिनंदन व्यक्त करैत मैपुप्र केर प्रबंध संपादक धर्मेन्द्र कुमार झा कहलनि कि, “ई संक्षिप्त समाचार बुलेटिन कतेको घरमे नवीन पीढ़ीक बच्चा सभक लेल जे प्रायः हिन्दीक अभ्यस्त भऽ गेल अछि, वरदानसँ कम नहिं, हुनकर जनतबक अनुसार कतेको घरक अभिवावक नियमित रुपसँ ई समाचार बुलेटिन अपन बच्चा सभकेँ सुनाबैत छथि आ ओ बच्चा सभ अपन मातृभाषा अभ्यस्तक संग-संग टटका सामान्य ज्ञान सेहो बढ़ाबैत अछि।”

प्रसिद्ध समाजसेवी डाॅ विनय कर्णक अनुसार ई मैथिली समाचार बुलेटिन आजुक संचार तंत्रक ग्लोबल दौड़मे मैथिलीक आवाज देश-विदेशमे रहनिहार कतेको मिथिलावासीक घर-घरमे सुनबैत अपन भाषा संस्कृतिसँ सभकेँ सतत जोड़ने रहैत अछि।

आर अनेको चर्चित व्यक्तित्वक अभिनंदन आ शुभकामना ‘मैथिल पुनर्जागरण प्रकाश’केँ प्राप्त भेल अछि, जाहिमे प्रत्येकमे सुमित सौरभक अंतरमनसँ प्रसंशा प्रेषित कयल गेल अछि। एहि क्रममे पटनासँ मिथिला-मैथिलीक मजबूत स्तंभ भैरव लाल दास, इतिहासकार शिव कुमार मिश्र, प्रो. वीरेन्द्र झा, मधुबनीसँ मिथिला-मैथिलीक चर्चित व्यक्तित्व साहित्यकार दिलीप कुमार झा, साहित्यकार प्रीतम निषाद, मिथिला-मैथिलीक मजबूत स्तम्भ ओ आंदोलनी प्रो. शीतलांबर झा, दरभंगासँ प्रसिद्ध साहित्यकार डाॅ योगानंद झा, प्रसिद्ध पत्रकार डाॅ प्रवीण कुमार झा, जमशेदपुरसँ मिथिला-मैथिलीक चर्चित व्यक्तित्व ओ मैथिली अकादमीक मैथिलीक पुर्व प्रतिनिधि डाॅ अशोक अविचल सहित मिथिलाक्षर साक्षरता अभियानक अनेकानेक अभियानी सम्मिलित छथि।