भारत-यूएई आर्थिक साझेदारीक विस्तारक व्यापक संभावना

गोयल कहलनि—निवेशक लेल कतेको क्षेत्रमे आकर्षक अवसर

नई दिल्ली । समदिया

केंद्रीय वाणिज्य एवं उद्योग मंत्री पीयूष गोयल कहलनि जे भारत-यूएई व्यापक आर्थिक भागीदारी समझौता (सीईपीए) दुनू देशक व्यापार आ निवेश सहयोगकेँ नव गति दऽ रहल अछि। भारतमे यूएई निवेशक लेल विभिन्न क्षेत्रमे व्यापक अवसर उपलब्ध अछि।

अबू धाबी इन्वेस्टमेंट अथॉरिटी (एडीआईए)क प्रबंध निदेशक शेख हमेद बिन जायद अल नाहयान संग भेंटक बाद गोयल कहलनि जे भारत-यूएई आर्थिक साझेदारीकेँ आरो मजबूत करबाक आ सीईपीएक लाभक अधिकतम उपयोग पर सार्थक चर्चा भेल।

दुनू देश समुद्री क्षेत्रमे जहाज स्वामित्व, आधुनिक बंदरगाह, जहाज निर्माण, मरम्मत, शिपब्रेकिंग आ कंटेनर निर्माण सहित छह क्षेत्रमे सहयोग बढ़ाओत। एहि लेल एकटा कार्य समूह गठित कएल जाएत।

गोयल कहलनि जे सरकार यूएईक भारतमे निवेशकेँ वर्तमान करीब 25 अरब डॉलरसँ बढ़ा कऽ 100 अरब डॉलर करबाक लक्ष्य पर काज कऽ रहल अछि। अंतरिक्ष, स्टार्टअप, बंदरगाह, जहाज निर्माण आ शेयर बाजारमे यूएईक रुचि बढ़ि रहल अछि। ऊर्जा क्षेत्रमे सेहो सहयोग बढ़ेबाक प्रयास जारी अछि।