भारत अपन करीबी मित्र नेपालकेँ, एखनि धरि सात विमानसँ 95 टन राहत सामग्री पहुंचेलक : विदेश मंत्रालय
नई दिल्ली । समदिया
नेपालमे आयल विनाशकारी बाढ़िक बीच भारत राहत आ बचाव कार्यमे हरसंभव सहयोग कऽ रहल अछि। विदेश मंत्रालयक प्रवक्ता रणधीर जायसवाल मंगलदिन कहलनि जे भारत एखनि धरि सातटा विमानक माध्यमसँ 95 टन राहत सामग्री नेपाल पठौलक अछि। किछु आओर राहत सामग्री जल्दिए नेपाल पठाओल जायत।
साप्ताहिक प्रेस वार्ताक दौरान जायसवाल कहलनि जे भारत नेपालक लोक आ सरकारक प्रति एकजुटता आ सहानुभूति व्यक्त कएने अछि। ओ कहलनि जे करीबी मित्र आ पड़ोसीक रूपमे भारत तत्काल नेपालक मददि लेल आगाँ आयल अछि आ राहत, बचाव आ पुनर्निर्माणक प्रयासमे सहयोग जारी राखत।
विदेश मंत्रालयक प्रवक्ता कहलनि, “नेपालमे हमर फोरेंसिक एक्सपर्ट आ टनल रेस्क्यू टीम तैनात अछि।” फोरेंसिक टीम काठमांडूक दूटा प्रयोगशालामे काज कऽ रहल अछि आ करीब 1200 सैंपलक जांच कएल जा रहल अछि। नेपालक आवश्यकताक आधार पर भारत अपन सहयोग जारी रखत।
275 भारतीय एखनहु लापता
जायसवालक अनुसार, प्राकृतिक आपदाक बाद 275 भारतीयक कोनो जानकारी नहि भेटल अछि। एहि संख्यामे चीनी क्षेत्रसँ लापता भेल 49 भारतीय सेहो शामिल छथि। ओतहि 169 भारतीयकेँ सुरक्षित रेस्क्यू कएल जा चुकल अछि।
बाढ़िमे 1358 लोकक मृत्यु
26 अगस्तकेँ नेपालमे आयल विनाशकारी बाढ़िमे एखनि धरि 1358 लोकक मृत्युक बातक पुष्टि कएल गेल अछि। नेपाल पुलिसक आंकड़ाक अनुसार 4000 सँ बेसी लोक लापता छथि, जाहिमे 598 विदेशी नागरिक शामिल छथि।
राहत सामग्रीमे जरूरी सामान शामिल
भारत नेपालकेँ राहत सामग्रीक रूपमे तिरपाल, कंबल, स्लीपिंग बैग, हाइजीन किट, सोलर लैंप, खाद्य सामग्री, दवाइ आ शल्य चिकित्सा सामग्री पठौने अछि। भारत स्पष्ट कएने अछि जे नेपालक एहि कठिन समयमे राहत आ बचाव कार्य लेल ओकर सहयोग निरंतर जारी रहत।
