बिहारमे बाढ़ि पर राहुलक हमला, कहलनि – १७ सालमे डबल इंजन सरकार की कएलक ?
पटना । समदिया
बिहारमे बाढ़िक भयावह स्थितिकेँ लऽ लोकसभामे विपक्षी नेता राहुल गांधी केंद्र आ राज्यक भाजपा नेतृत्ववाला डबल इंजन सरकार पर निशाना साधलनि। रविदिन सोशल मीडिया पर पोस्ट कऽ ओ कहलनि जे बिहारमे बाढ़ि फेर कहरि बनि कऽ टूटल अछि। लाखों लोक प्रभावित छथि आ सैकड़ों गाम डूबल अछि। मृतक आ लापता लोकक खबरि पर ओ शोक व्यक्त कएलनि।
राहुल गांधी कहलनि जे बिहारमे बाढ़िक संकट कोनो नव बात नहि अछि। प्रत्येक साल बाढ़ि अबैत अछि, लोकक मृत्यु होइत अछि, परिवार उजड़ैत अछि आ पलायन करऽ पड़ैत अछि। ओ सरकारसँ सवाल कएलनि जे पछिला १७ सालमे एहि वार्षिक त्रासदीसँ निपटबाक लेल की ठोस काज कएल गेल ? लोककेँ हर साल राहत आ आश्वासन नहि, स्थायी समाधान चाही।
राहुलक बयानक बाद बिहारक राजनीतिक माहौल गरमा गेल अछि। कोसी, गंडक आ बागमतीक जलस्तर बढ़ल रहबाक कारण सुपौल, सहरसा, दरभंगा, मुजफ्फरपुर सहित कतेको जिलामे स्थिति गंभीर अछि।
