बिहारक बाढ़ि त्रासदी पर तेजस्वीक सरकार पर प्रहार
कहलनि – ४५ लाखसँ बेसी लोक प्रभावित, डबल इंजन सरकारक दुनू इंजनमे लागल आगि
पटना । समदिया
बिहारमे बाढ़िक भयानक त्रासदी पर राजनीतिक बयानबाजी तेज भऽ गेल अछि। नेता प्रतिपक्ष आ राजदक राष्ट्रीय कार्यकारी अध्यक्ष तेजस्वी प्रसाद यादव रविकेँ राज्य आ केंद्र सरकार पर जमि कऽ निशाना साधलनि। ओ दावा कएलनि जे राज्यमे ४५ लाखसँ बेसी लोक बाढ़िसँ प्रभावित छथि, मुदा सरकार एहि संकटकेँ गंभीरतासँ नहि लऽ रहल अछि।
पटना स्थित अपन आवास पर पत्रकार सम्मेलनमे तेजस्वी कहलनि जे ओ प्रधानमंत्रीकेँ पत्र लिखि बाढ़िकेँ राष्ट्रीय आपदा घोषित करबाक, प्रभावित परिवारकेँ मुआवजा देबाक आ विशेष आर्थिक पैकेज देबाक मांग कएलनि अछि। मुख्यमंत्रीकेँ सेहो पत्र देल गेल, मुदा एखनि धरि अपेक्षित कार्रवाई नहि भेल अछि।
तेजस्वी कहलनि जे बिहारमे एनडीएक ३१ लोकसभा सांसद आ सात केंद्रीय मंत्री छथि, तैयो बाढ़ि पीड़ितकेँ पर्याप्त सहायता नहि भेटि रहल अछि। ओ सरकार पर आरोप लगौलनि जे बाढ़ि प्रभावित लोकक लेल चलाओल जा रहल सामुदायिक रसोइक सूची सेहो उपलब्ध नहि कराओल जा रहल अछि।
कोसीक पिछला बाढ़िक उल्लेख करैत तेजस्वी कहलनि जे ओहि समय बिहारकेँ विशेष सहायता भेटल छल। हुनकर आरोप छल जे वर्तमान केंद्र सरकार बिहारक प्रति उपेक्षापूर्ण रवैया अपनौने अछि। ओ कहलनि जे चुनावक समय प्रधानमंत्री आ गृहमंत्री बिहारमे देखाइत छथि, मुदा आपदाक समय लोकक बीच अपेक्षित रूपसँ नहि देखाइत छथि।
तेजस्वी बाढ़िक स्थायी समाधानक लेल सेहो सरकार पर ठोस पहल नहि करबाक आरोप लगौलनि। ओ अपन बाढ़ि प्रभावित क्षेत्रक दौरा करबाक प्रसंगमे कहलनि जे निरीक्षणक क्रममे हुनकर नाव नदीक बीचमे फँसि गेल छल आ ग्रामीण सभक सहयोगसँ बचलाह।
ओ सरकार पर पत्रकार सभकेँ प्रताड़ित करबाक आरोप सेहो लगौलनि। तेजस्वी कहलनि जे सरकारसँ सवाल पूछनिहार पत्रकारक संग दुर्व्यवहार लोकतांत्रिक व्यवस्था लेल उचित नहि अछि।
