बहिन-बेटीके सुरक्षा पर सम्राट सख्त, कहलथि – छूबयवाला २४ घंटाक भीतर जेलमे’
रोहतास । समदिय
बिहारक मुख्यमंत्री सम्राट चौधरी कहलनि जे राज्यमे महिला सुरक्षा संग कोनो तरहक समझौता नहि कयल जायत। रोहतासक जमुहारमे आयोजित युवा संवाद कार्यक्रममे ओ कहलनि जे कोनो बहिनकेँ जँ केओ छूबयकेँ प्रयास करत, तँ २४ घंटाक भीतर ओकरा जेलमे पठाओल जायत।
मुख्यमंत्री कहलनि जे बिहारमे प्रतिदिन करीब १ करोड़ ८१ लाख महिला अपन काजक लेल घरसँ बाहर निकलैत छथि। हालक दिनमे सोशल मीडिया आ मीडिया पर आएल आपत्तिजनक वीडियो सभक मामिलामे सरकार तत्काल कार्रवाई कयलक अछि। हुनकर अनुसार, ई बदलैत बिहारक तस्वीर अछि आ महिला सभक सुरक्षा लेल प्रशासन पूरा तरह सतर्क अछि।
कानून-व्यवस्था पर सरकारक जोर
गुजरातक बड़नगरसँ बाइकसँ वाराणसी यात्रा पर निकलल सेवा यात्री सभक संग संवाद करैत मुख्यमंत्री कानून-व्यवस्था, महिला सुरक्षा, विकास आ सुशासनक विषय पर सरकारक प्राथमिकता बतौलनि। ओ कहलनि जे बहिन-बेटी सभ बिना भय घरसँ बाहर निकलि काज करथि, ई सरकारक जिम्मेवारी अछि।
सम्राट चौधरी विपक्ष पर सेहो निशाना साधैत कहलनि जे किछु लोक सत्ताकेँ ‘मेवा’ प्राप्त करबाक अवसर बुझैत छथि, जखनिकि भाजपा आ एनडीए सत्ताकेँ जनसेवाक माध्यम मानैत अछि। ओ कहलनि जे सत्तामे अयबाक उद्देश्य जनताक सेवा आ राज्यक विकास होयबाक चाही।
