गांधी मैदान सहित अन्य जिलामे बिहार दिवस समारोहक शुभारंभ, तीन दिन धरि उत्सवक महफिल

पटना। समदिया

बिहारक स्थापनाक 114म गौरवशाली वर्षक अवसर पर राज्यक राजधानी पटनाक ऐतिहासिक गांधी मैदानमे काल्हि ‘बिहार दिवस 2026’ केर औपचारिक उद्घाटन कयल गेल। मुख्यमंत्री नीतीश कुमार तीन दिनक राज्य स्तरीय उत्सवक प्रारंभक अवसर पर समारोहक दीप प्रज्वलित कयलनि। एहि बेरक आयोजनक विशेष महत्व अछि, कारण राज्य सरकार एकर आयोजन ‘उन्नत बिहार, उज्जवल बिहार’ विषयक तहत भव्य पैमाना पर कयलक अछि, जाहिमे बिहारक प्रगति आ समृद्ध धरोहरक जीवंत झलक भेटैत अछि। उद्घाटन समारोहक दौरान मुख्यमंत्री नीतीश कुमारक संग मंच पर उपमुख्यमंत्री सम्राट चौधरी, बिहार सरकारक वरिष्ठ मंत्री आओर प्रशासनिक क्षेत्रक कतेको विशिष्ट अधिकारी शामिल छलाह। 22 मार्चसँ शुरू भ अगिला तीन दिन धरि चलय वला एहि महोत्सवक लेल महोत्सवमे कार्यक्रमक एक लंबा श्रृंखला तैयार कयल जेल अछि। गांधी मैदानमे अलग-अलग विभाग द्वारा भव्य प्रदर्शनी लगाओल जेल अछि, जतय बिहारक हस्तशिल्प, कृषि क्षेत्रक नव तकनीक आ औद्योगिक विकासक मॉडलकेँ प्रदर्शित कयल जेल अछि। दर्शकक लेल विशेष रूपसँ सांस्कृतिक दीर्घा बनाओल गेल अछि, जे राज्यक विभिन्न जिलाक लोक कला आ खान-पानक विविधताकेँ जीवंत कय रहल अछि। उत्सव केर प्रमुख आकर्षणमे साँझ केर सांस्कृतिक कार्यक्रम सेहो शामिल अछि, जाहिमे देशभरि आ दुनियाभरि केँ नामी कलाकारक प्रस्तुति अछि। स्थानीय लोक गायकसँ ल कय बॉलीवुड प्लेबैक गायक धरि अगिला तीन दिनमे गांधी मैदानक जीवंततामे कलाकारक प्रस्तुति होयत। सुरक्षा आ सुविधा केर कड़ा व्यवस्थाक बीच भारी भीड़-जे नहि सिर्फ पटनासँ बल्कि राज्य केर अन्य भागसँ सेहो आबैत अछि जे एही उत्सवमे भाग लेबय लेल जमा भ रहल अछि। प्रशासनिक स्तर पर एहि आयोजनक सफलता सुनिश्चित करबा लेल मजबूत तैयारी कयल गेल अछि। एहि अवसर पर उपमुख्यमंत्री सम्राट चौधरी कहलनि ‘बिहार दिवस’क माध्यमसँ युवाकेँ राज्यक विकासक मुख्यधारासँ जोड़ब सरकार लेल सर्वोच्च प्राथमिकता बनल अछि। 24 मार्च धरि चलय वला एही उत्सवक समापन विशेष सांस्कृतिक संध्या आ पुरस्कार समारोहक संग होयत, जाहि केर दौरान विभिन्न क्षेत्रमे उत्कृष्ट योगदान दै वला विशिष्ट व्यक्तिकेँ सम्मानित कयल जायत।