खैबर पख्तूनख्वामे पुलिस चेकपोस्ट लग सुसाइड ब्लास्ट, 11 गोटेक मृत्यु
नई दिल्ली । समदिया
पाकिस्तानक खैबर पख्तूनख्वा प्रांतमे पुलिस चेकपोस्ट लग भेल आत्मघाती विस्फोटमे 11टा लोकक मृत्यु भऽ गेल अछि, जखनिकि 20 गोटे घायल छथि। मृतकमे आठ पुरुष, दू महिला आ एकटा बच्चा शामिल अछि। घायलमे पुलिसकर्मी, कस्टम अधिकारी आ दूटा आम नागरिक छथि।
पाकिस्तानी अखबार डॉनक अनुसार, खैबर पख्तूनख्वा आ बलूचिस्तानक सीमा लग डेरा इस्माइल खानक दराजिंदा स्थित ‘अमन मेला’ पुलिस चेकपोस्ट पर ई विस्फोट भेल। उक्त चेकपोस्ट डीआई खान-क्वेटा मार्ग पर सुरक्षा आ जाँच लेल उपयोग होइत अछि। तहरीक-ए-तालिबान पाकिस्तान (TTP) एहि हमलाक जिम्मेदारी लेलक अछि।
घटनाक बाद राहत-बचाव कार्य शुरू कऽ देल गेल। रेस्क्यू टीम मलबामे फँसल लोककेँ बाहर निकाललक। विस्फोटक कारणक जाँच लेल बम निरोधक दस्ताकेँ सेहो घटनास्थल पर पठाओल गेल अछि।
खैबर पख्तूनख्वाक राज्यपाल फैसल करीम कुंडी वरिष्ठ अधिकारीसँ घटनाक विस्तृत रिपोर्ट मँगौलनि आ घायलक समुचित चिकित्सा सुनिश्चित करबाक निर्देश देलनि। प्रांतमे हालक महीनामे सुरक्षा बल आ पुलिसकेँ निशाना बना कऽ कतेको हमला भेल अछि। PICSSक आँकड़ाक अनुसार, अगस्तमे मात्र एतय एहि तरहक 54 घटना दर्ज भेल छल।
