आवास योजनामे बिहारकेँ PMAY-U 2.0 मे दूटा राष्ट्रीय पुरस्कार
पटना । समदिया
प्रधानमंत्री आवास योजना-शहरी (PMAY-U) 2.0 क प्रभावी क्रियान्वयन लेल बिहारकेँ दूटा राष्ट्रीय पुरस्कार भेटल अछि। विश्व पर्यावास दिवस पर नई दिल्लीमे आयोजित कार्यक्रममे आवासन एवं शहरी कार्य मंत्रालयक तरफसँ बिहारकेँ ई सम्मान देल गेल।
बिहारकेँ सर्वश्रेष्ठ प्रदर्शन करयवला राज्य आ पैघ राज्यक श्रेणीमे विशेष मान्यता पुरस्कार भेटल अछि। पहिल पुरस्कार स्वीकृत आवासक तुलनामे सर्वाधिक आवासक ग्राउंडिंग सुनिश्चित करबाक लेल देल गेल, जखनिकि दोसर पुरस्कार निर्धारित लक्ष्यक विरुद्ध सर्वाधिक प्रतिशत आवास स्वीकृत करयमे उत्कृष्ट प्रदर्शन लेल देल गेल।
नगर विकास एवं आवास मंत्री नीतीश मिश्रा कहलनि जे ई सम्मान राज्यमे आवास निर्माणक तेज गति आ पात्र लाभार्थी धरि योजनाक लाभ पहुँचाबय लेल सरकारक निरंतर प्रयासक प्रमाण अछि। हुनका अनुसार प्रधानमंत्री नरेंद्र मोदीक ‘सबकेँ लेल आवास’क संकल्पक दिशामे बिहार लगातार आगाँ बढ़ि रहल अछि।
मंत्री एहि उपलब्धि लेल विभागीय अधिकारी आ पूरा टीमकेँ बधाई देलनि। बिहारक तरफसँ सचिव डॉ. संदीप कुमार आर. पुडकलकट्टी, विशेष सचिव-सह-मिशन निदेशक शाहिद परवेज आ परियोजना पदाधिकारी-सह-अपर निदेशक उमाकांत पांडे पुरस्कार ग्रहण केलनि।