अमेरिकी राजदूत सर्जियो गोरक अनुसार भारत-अमेरिकाक बीच प्रस्तावित ट्रेड डील लकचियायल

नई दिल्ली । समदिया

भारत आ अमेरिकाक बीच प्रस्तावित व्यापार समझौता आब अंतिम चरणमे पहुँचि गेल अछि। भारतमे अमेरिकी राजदूत सर्जियो गोर कहलनि जे सिद्धांत रूपमे ट्रेड डीलक लगभग समस्त प्रमुख बिंदु पर सहमति बनि गेल अछि आ आब दुनू पक्ष कानूनी आ तकनीकी भाषाक अंतिम रूप देबाक काज कऽ रहल अछि।

राष्ट्रीय राजधानीमे आयोजित एकटा कार्यक्रममे गोर कहलनि जे समझौता केर मुख्य बिंदु पहिनहि तय भऽ गेल छल। आब किछु टेक्स्ट आ प्रावधानकेँ पुनर्गठित कऽ ओकरा अंतिम रूप देबाक प्रक्रिया चलि रहल अछि। हुनकर शब्दमे, “सिद्धांत रूपमे ट्रेड डीलक लगभग सभ काज पूरा भऽ चुकल अछि।”

हुनका अनुसार, समझौताक अंतिम रूप देबामे भेल देरीक मुख्य कारण कानूनी आ तकनीकी भाषासँ जुड़ल प्रक्रिया अछि।

अमेरिकी राजदूत रूससँ तेल खरीदनिहार देशसभ पर 100 प्रतिशत धरि टैरिफ लगाबऽ संबंधी अमेरिकी कांग्रेसमे प्रस्तावित कानून पर सेहो बात कएलनि। ओ कहलनि जे एहि प्रस्तावकेँ अमेरिकी राजनीति केर दुनू पक्षक नेतासभक समर्थन भेटि रहल अछि। मुदा ई व्हाइट हाउस द्वारा शुरू कएल गेल पहल नहि अछि।

गोर कहलनि, “ई एहेन चीज नहि अछि, जाहि पर व्हाइट हाउसक समर्थन रहल होए। राष्ट्रपति ट्रंप द्वारा एहि प्रस्तावकेँ आगाँ बढ़बैत कोनो क्लिप अहाँकेँ नहि भेटत।”

भारत पर एकर संभावित प्रभावक संबंधमे गोर कहलनि जे अमेरिकी राष्ट्रपति डोनाल्ड ट्रंपक प्राथमिकता रूस-यूक्रेन युद्धकेँ समाप्त करब अछि। हुनका अनुसार, ट्रंप पहिल दिनसँ एहि संघर्षक समाप्ति लेल प्रतिबद्ध छथि आ एकरा अत्यंत जरूरी मानैत छथि।

गोर राष्ट्रपति ट्रंप आ प्रधानमंत्री नरेंद्र मोदीक बीचक संबंधकेँ “गंभीर आ व्यक्तिगत दोस्ती” कहलनि। ओ कहलनि जे दुनू नेता परिणाममुखी छथि आ साझा हितक विषयसभ पर तेजीसँ काज करबाक पक्षधर छथि।

हुनका अनुसार, “दुनू नेता आगाँक सोचैत छथि, तेजीसँ काज करऽ चाहैत छथि आ परिणाम पर ध्यान दैत छथि। हमर राष्ट्रपति प्रधानमंत्रीक बहुत सम्मान करैत छथि।”

सन् 2020 केर अमेरिकी राष्ट्रपति चुनावक बादक समयक उल्लेख करैत गोर कहलनि जे जखनि ट्रंप पद पर नहि छलाह, तखनि प्रधानमंत्री मोदीक लगातार समर्थन हुनका पर गहिंर छाप छोड़ने छल। ओ कहलनि जे सत्तासँ बाहर रहबाक समयेमे असली मित्रक पहिचान होइत अछि आ एहि दौरमे प्रधानमंत्री नरेंद्र मोदी ट्रंपक सच्चा मित्र सिद्ध भेलाह।

गोरक अनुसार, दुनू नेताक बीचक आपसी विश्वास भारत-अमेरिका संबंधकेँ आओर मजबूत कऽ रहल अछि।

सर्जियो गोरक बयानसँ स्पष्ट अछि जे भारत-अमेरिका व्यापार समझौता आब अंतिम दौरमे अछि। कानूनी आ तकनीकी औपचारिकता पूरा होइते दुनू देशक आर्थिक संबंधमे एकटा महत्वपूर्ण अध्याय जुड़ि सकैत अछि।