अपराध सुपौलमे युवककेँ गोली मारि हत्या, पुलिस जीप छल लगेमे August 14, 2024 Maithil Punarjagran Prakash सुपौल समदिया * मंगलदिन भोरमे सुपौलक जदिया थाना क्षेत्रमे अपराधी एकटा २० वर्षीय युवककेँ गोली मारि हत्या कऽ देलक । मृतकक पहिचान भास्कर कुमारक रूपमे भेल अछि। भास्कर कुमार काज पर जा रहल छल तखन बाइक सवार दूटा अपराधी हुनका गोली मारि देलक। घटनाक समय जदिया थानाक पुलिस सेहो घटनास्थल लग गश्त लगा रहल छल। गोलीक आवाज सुनि पुलिस भागि रहल अपराधीक पीछा कयलक, मुदा उपद्रवी भागबामे सफल रहल। एहि घटनाक बाद क्षेत्रमे दहशत पसरि गेल अछि। एहि घटनाक संबंधमे कहल जाइत अछि जे भास्कर कुमार मंगलदिन भोर ४:३० बजे अपन काजपर जा रहल छलाह। भास्करकेँ जदिया हाई स्कूलक समीप बाइक सवार चारिटा अपराधी माथमे गोली मारि देलक, जाहिसँ हुनक मौकापर मृत्यु भऽ गेल। भास्कर जदिया वार्ड नम्बर ६ निवासी सुबोध यादवक पुत्र छथि। घटनाक बाद स्थानीय लोकक भीड़ घटनास्थल पर जमा भऽ गेल। ओतहि घटनास्थल पर पहुँचलाक बाद पुलिस मामिलाक जाँच शुरू कऽ देलक आ मृतकक परिवारकेँ घटनाक जानकारी देलक। घटनाक सूचना भेटलाक बाद क्षेत्रमे तनावक माहौल बनि गेल अछि। हत्याक सूचना भेटलाक बाद परिवारक सदस्य घटनास्थल पर पहुँचलाह आ शवकेँ त्रिवेणीगंज-रानीगंज रोड एनएच ३२७ई पर राखि जदिया बाजार अवरुद्ध कऽ देलनि। एहि कारणेँ यातायात पूर्ण रूपसँ बाधित भऽ गेल छल। परिवारक सदस्य वरिष्ठ पुलिस अधिकारीकेँ बजा कऽ अपराधीसभकेँ जल्दिये गिरफ्तार करबाक माँग कऽ रहल छथि। जदिया थानाक पुलिस घटनास्थल पर पहुँचि स्थिति पर काबू पाबय केर कोशिश कयलक। हत्याक कारण एखनि धरि पता नहिं चलल अछि। पुलिस परिवार सs पूछताछ कs रहल अछि। अपराधीसभकेँ गिरफ्तार करबाक लेल लगपासक क्षेत्रमे पुलिस थानाकेँ सतर्क कऽ देल गेल अछि। पुलिसक दावा अछि जे अपराधी सभकेँ जल्दिये गिरफ्तार कऽ लेल जायत। Spread the love
