उत्तर प्रदेशक मुख्यमंत्री योगी आदित्यनाथ एक बेर फेर धार्मिक स्थल पर लगाओल लाउडस्पीकरक लेल स्थायी ध्वनि नियंत्रणक उपायक आह्वान कयलनि अछि। एकटा वक्तव्यमे सर्किट हाउसमे विकास परियोजना आ कानून-व्यवस्थाक समीक्षा करैत ओ अधिकारीसभकेँ होली उत्सवक दौरान जोरसँ डीजे पर सख्तीसँ रोक लगयबाक निर्देश सेहो देलनि।
मुख्यमंत्री अधिकारीसभकेँ बैंक, वित्तीय संस्थान, दोकान,आ वाणिज्यिक प्रतिष्ठान सन प्रमुख स्थानपर सीसीटीवी कैमरा लगयबाक निर्देश देलनि।
ओ पशु तस्करीक सख्त निगरानीक आदेश देलनि आ एहिमे शामिल तस्कर, वाहन मालिक आ पुलिसकर्मीक खिलाफ सख्त कार्यवाहीक चेतावनी देलनि। एडीजी जोन पीयूष मोर्डीयाकेँ राज्यमे पशु तस्करीपर पूर्ण प्रतिबन्धक प्रभावी कार्यान्वयनक लेल जिलावार समीक्षा करबाक निर्देश देल गेल छल।
वक्तव्यमे कहल गेल अछि, “आदित्यनाथ विकास परियोजनासभकेँ तेज करबा पर सेहो ध्यान केन्द्रित कयलनि, देरीक विरुद्ध चेतौनी देलनि आ अधिकारीसभकेँ प्रत्येक निर्माणाधीन परियोजनाक लेल नोडल अधिकारी नियुक्त करबाक, साप्ताहिक निरीक्षण करबाक आ प्रगति रिपोर्ट प्रस्तुत करबाक निर्देश देलनि।”
किछु परियोजनामे देरीकेँ देखैत ओ अधिकारी सभकेँ गुणवत्ता सुनिश्चित करैत काजकेँ गति देबाक आदेश देलनि।” एहिमे कहल गेल अछि जे गर्मी नजदीक आबि रहल अछि, ओ अधिकारीसभकेँ निर्बाध जल आपूर्ति सुनिश्चित करबाक निर्देश देलनि।
ओ फ्लाईओवरक स्तम्भकेँ कलात्मक चित्र आ उच्च गुणवत्तावला विज्ञापनसँ सुशोभित करबाक प्रस्ताव सेहो देलनि।
मुख्यमंत्री अधिकारीसभकेँ शहरमे पथ पर विक्रेता सभक लेल पर्याप्त वेंडिंग जोन बनयबाक निर्देश देलनि।
योगी आदित्यनाथ अधिकारी सभकेँ गहूम खरीद केन्द्रपर किसानक लेल किफायती भोजन, मुफ्त पेयजल, आ बैसबाक उचित व्यवस्था सुनिश्चित करबाक निर्देश सेहो देलनि। बयानक अनुसार जिला मजिस्ट्रेट बतौलनि जे 17 मार्चसँ जिलाक 36 केंद्र पर 2,425 रुपया प्रति क्विंटलक दरसँ गहूम खरीद शुरू होएत। एहिमे कहल गेल अछि जे मुख्यमंत्री जिलामे कामकाजी महिलाक लेल छात्रावास आ किफायती कैंटीनक स्थापनाक निर्देश देलनि अछि।
ओ होलिका दहन आ होलीक दौरान सख्त निगरानी रखबाक निर्देश सेहो देलनि। ओ अधिकारीसभकेँ आदेश देलनि जे प्रत्येक थानासँ शीर्ष दस अपराधीक पहिचान कयल जाय।
