पश्चिम बंगालमे कोलकाताक जादवपुर विश्वविद्यालय परिसरमे ‘आजाद कश्मीर’ लिखल भित्तिचित्र देखल गेल, जे हंगामा मचा देलक अछि। एतय ‘फ्री फिलिस्तीन’ सन नारा सेहो लिखल गेल अछि। आब पुलिसक अनुसार एहि संबंधमे प्राथमिकी दर्ज कयल गेल अछि।
एकटा वरिष्ठ अधिकारी बतौलनि जे भित्तिचित्र लगयबामे कथित संलिप्तताक लेल अज्ञात लोकक विरुद्ध प्राथमिकी दर्ज कयल गेल अछि। ओ कहलनि, “जादवपुर थानामे भारतीय दंड संहिता (बीएनएस) केर धारा 61 (2) (आपराधिक षड्यंत्र) आ 152 (संप्रभुता, एकता आ अखंडताक खतरामे डालय वाला काज) के तहत स्वत: संज्ञानसँ मामला दर्ज कयल गेल अछि।”
सोमकेँ विश्वविद्यालयक गेट नंबर ३ लग एकटा देबाल पर “फ्री कश्मीर” आ “फ्री फिलिस्तीन” नारा लिखल कारी रङ्गक भित्तिचित्र देखल गेल छल मुदा ई पता नहि चलि सकल जे एहि कृत्यक पाछाँ के अछि वा कोन समूहक हाथ छल।
अधिकारी कहलनि, “एहि भित्ति चित्र आ पोस्टरमे एहेन संदेश अछि जे राष्ट्रीय एकताक भावनाकेँ ठेस पहुँचाबैत अछि। एकर पाछू जे अछि तकरा खिलाफ जरूरी कार्यवाही कएल जाएत। ओ उल्लेख कयलनि जे पुलिस विश्वविद्यालयक छात्रसभक सूची तैयार कयलक अछि जिनका जाञ्चक हिस्साक रूपमे पूछताछ कयल जा सकैत अछि।
जादवपुर विश्वविद्यालयमे पिछला किछु दिनसँ विरोध प्रदर्शन चलि रहल अछि, जतय १ मार्चकेँ परिसरमे वामपंथी विरोधक क्रममे राज्यक शिक्षा मंत्री ब्रत्य बसुक कार आ हुनक सङ्ग आबि रहल दोसर वाहनसँ टकरा गेलासँ दूटा छात्रक घायल होयबाक खबरि अछि।
हिंसाक संबंधमे बसु आ प्रोफेसर एवं टीएमसी नेता ओम प्रकाश मिश्रक विरुद्ध प्राथमिकी दर्ज कयल गेल अछि।
