विश्व आर्थिक मंच (डब्ल्यूईएफ)क पाँच दिवसीय वार्षिक बैसारमे दुनिया भरिसँ एकत्रित नेता कृत्रिम बुद्धिमत्ता (एआई)क अनियंत्रित प्रसारक विरुद्ध कारवाईक मांग कयलनि। ई वार्षिक बैसार शुक्र दिन समाप्त होएत। स्पेनक प्रधानमन्त्री पेड्रो सांचेज अपन विशेष संबोधनमे गलत सूचना आ साइबर उत्पीड़नकेँ रोकबाक लेल यूरोपीय संघक सोशल मीडियाक प्रशासनमे सुधारक अपील कयलनि।
ओ डिजिटल सेवा अधिनियमक कठोर प्रवर्तन आ पारदर्शिताक लेल यूरोपीय केन्द्रक शक्तिक विस्तारक आवश्यकतापर जोर देलनि। ओ जोर देलनि जे “यूरोपीय संघक मूल्य बिकाऊ नहि अछि।” ओ सोशल मीडिया एल्गोरिदम पर शोधक लेल धन बढ़यबाक आह्वान कयलनि। हुनक अनुसार, ई सुनिश्चित करब आवश्यक अछि जे यूरोपक सबसँ प्रतिभाशाली व्यक्ति एहि महत्वपूर्ण चुनौतीक समाधान ताकि सकय।
संयुक्त राष्ट्र महासचिव एंतोनिया गुतारेस दूटा बढ़ैत वैश्विक खतराक विषयमे एकटा कड़ा चेतावनी जारी कयलनि : कृत्रिम बुद्धिमत्ताक अनियंत्रित विस्तार आ जलवायु संकट। ओ आगाह कयलनि जे ई चुनौती मानवताक लेल अभूतपूर्व खतरा उत्पन्न करैत अछि। एहि संबंधमे सरकार आ निजी क्षेत्र द्वारा तत्काल समन्वित कारवाई कयल जेबाक चाही।
कांगो लोकतांत्रिक गणराज्यक राष्ट्रपति फेलिक्स-एंटोनी त्सेसीकेदी त्सिलोंबो दुनियाक सबसँ पैघ उष्णकटिबंधीय वनक संरक्षणक लेल हरित गलियाराक निर्माणक घोषणा कयलनि। ई कांगो नदी बेसिनमे किवुसँ किंशासा धरि ५५०,००० वर्ग किलोमीटरसँ बेसी वन क्षेत्रक रक्षा करत। एम्हर बशर अल-असदक शासनक अचानक पतनक किछु सप्ताह बाद सीरियाक विदेश मंत्री असद हसन अल-शैबानी नव सरकारक योजनाक रूपरेखा तैयार कयलनि। ओ कहलनि, “हम अतीत दिसि नहि देखब। हम भविष्य दिसि देखब। आ हम अपन लोकसभसँ प्रतिज्ञा करैत छी जे एहि कष्टक पुनरावृत्ति नहि होयत।”
एम्हर ईरानक सामरिक मामिलाक उपराष्ट्रपति जावेद जरीफ आशा व्यक्त कयलनि जे अमेरिकी राष्ट्रपति डोनाल्ड ट्रम्प २०१८ मे अपन दोसर कार्यकालमे संयुक्त व्यापक कार्य योजना (जेसीपीओए वा ईरान परमाणु समझौता) सँ हटयबापर पुनर्विचार करथि आ समझौता छोड़बाक परिणामक विषयमे बेसी गंभीर, केंद्रित आ यथार्थवादी रहय केर आशा अछि।
