राजस्व आ भूमि सुधार विभागक मंत्री संजय सरावगी कहलथि जे सर्वरक खराबीक कारण भूमि सर्वेमे अपेक्षित प्रगति नहि भ’ पाबि रहल अछि। निदेशालयक आईटी टीम कहलनि जे सभ 9 प्रमंडलक डाटा अलग करबामे समय लागल अछि। आब तेजीसँ डाटा आबि रहल अछि।
बिहारमे भूमि सर्वेक लेल लोकसमुदायक कतेको प्रकारक उलझन बनि रहल छल, मुदा आब राजस्व आ भूमि सुधार विभागक मंत्री संजय सरावगी पैघ राहतक घोषणा कयलनि अछि।
ओ कहलनि जे भूमि सर्वे केर स्वघोषणा संग जमीनक सभ कागजात संलग्न करब एखनि आवश्यक नहि अछि। फिलहाल जमीनक जतबा कागजात रैयतक लग उपलब्ध अछि, ततबा संलग्न करू। बाकी कागजातक इंतजाम किस्तवार आ खानापूर्तिक समय तक क’ लेब। एहि प्रकारें बिहारक जमीन मालिक सभ बेहतर ढंगसँ भूमि सर्वेमे अपन भागीदारी सुनिश्चित क’ सकैत छथि।
संजय सरावगी सर्वे निदेशालयक अधिकारी सभक संग भूमि सर्वेक प्रगतिक समीक्षा कऽ रहल छलथि। बैसारमे विभागक सचिव जय सिंह सेहो उपस्थित छलाह।
बैसारमे स्वघोषणाक तिथि बढ़ाबय केर संभावना पर सेहो चर्चा कयल गेल। तिथि बढ़ाबय केर क्रममे आबि रहल तकनीकी आ विधिक कठिनाई पर सेहो विचार कयल गेल।
मंत्री संजय सरावगीकेँ सर्वे निदेशालय केर अधिकारी द्वारा कहल गेल जे 31 मार्च तक कुल 11500916 स्वघोषणा प्राप्त भेल अछि। एहेनमे रैयत द्वारा शिविर सभमे जमा कयल गेल ऑफलाइन आ रैयत द्वारा निदेशालय केर वेबसाइट पर जमा कयल गेल ऑनलाइन, दुनू प्रकारक स्वघोषणा शामिल अछि। एहनमे दोसरा चरणमे शुरू कयल गेल 36 जिलाक सभ 445 अंचल (सर्वे शिविर) मे रैयत द्वारा जमा कयल गेल स्वघोषणा केर संख्या सेहो जोड़ल गेल अछि। समीक्षाक क्रममे किछु जिलामे स्वघोषणा केर संख्या बेसी कम देखि क’ मंत्री नाराजगी जाहिर कएलाह। उपस्थित अधिकारी सभसँ खराब प्रदर्शन वाला जिलाक/सर्वे शिविर सभ केर चिन्हित करबाक निदेश देल गेल। संगहि चेतावनी देल गेल जे खराब प्रदर्शन वाला शिविर केर कर्मी सभ जँ 15 दिनमे अपन प्रदर्शन नहि सुधारैत छथि त’ हुनका कार्य मुक्त करबाक प्रक्रिया शुरू कएल जायत।
एहि अंचल सभमे स्वघोषणामे कमी पाओल गेल अछि। पश्चिम चंपारण जिलाक 5 अंचल – बेतिया, पिपरासी, मधुबनी, ठकराहा आ भितहामे स्वघोषणा संख्याँ सभसँ कम पाओल गेल। ठीक एहि तरहे, पूर्वी चंपारण जिलाक 5 अंचल – पिपराकोठी, तुरकौलिया, बनकटवा, छौड़ादानो आ रक्सौलमे स्वघोषणा संख्याँ काफी कम रहल। चंपारणक ई 10 अंचल संपूर्ण बिहारमे स्वघोषणा प्राप्त करबामे सभसँ पाछू रहल। बेतिया सदरमे एखन धरि मात्र 187 स्वघोषणा प्राप्त भेल अछि जखनिकि पिपरासी अंचलमे प्राप्त स्वघोषणाक संख्याँ मात्र 524 अछि।
दोसरा दिसि अररिया सदर अंचलमे रैयत सभसँ प्राप्त स्वघोषणाक संख्याँ 136777 पहुँचि गेल अछि। दोसर नंबर पर दरभंगाक बिरौल शिविरमे कुल 114067 स्वघोषणा प्राप्त भेल अछि। दरभंगाक बहेड़ी, कुशेश्वर स्थान, अररियाक जौकी हाट, फारबिसगंज आ पलासीमे बहुत संख्याँमे रैयत सभ स्वघोषणा जमा कएलनि अछि। ठीक एहि तरहे समस्तीपुरक कल्याणपुर आ औरंगाबादक नबीनगर सर्वे शिविरक स्थिति सेहो स्वघोषणा प्राप्त करबाक मामलामे संतोषप्रद अछि।
