लोकसभामे प्रतिपक्षक नेता राहुल गाँधी बृहस्पतिकेँ लोकसभा अध्यक्ष ओम बिड़लासँ भेंट कयलनि। राहुल संसदमे आपातकाल पर सत्तारूढ़ गठबन्धनक नेता द्वारा कयल गेल टिप्पणीपर अप्रसन्नता व्यक्त कयलनि। ओ कहलनि, “ई विशुद्ध रूपसँ राजनीतिसँ प्रेरित छल आ नहिं कयल जयबाक चाही। कांग्रेस महासचिव केसी वेणुगोपाल राव एहि बारेमे जानकारी देलनि।
वेणुगोपाल कहलनि, “ई शिष्टाचार भेंट छल। राहुल गाँधीकेँ प्रतिपक्षक नेता चुनल गेलाक बाद इंडियाक घटक दलक नेता लोकसभा अध्यक्षसँ भेंट कयलनि। जखन कांग्रेस महासचिवसँ ई प्रश्न पूछल गेल जे की राहुल गाँधी ओम बिड़लाक समक्ष सदनमे उठाओल गेल आपातकालक मुद्दापर चर्चा कयलनि ? एकर जवाबमे वेणुगोपाल कहलनि कि ‘हम सदनक कामकाजक अनेक मुद्दा आ आपातकालक मुद्दा पर सेहो चर्चा कयलहुं।
विपक्षक नेताक रूपमे राहुल गांधी एहि मुद्दा पर कहलनि कि लोकसभा अध्यक्ष द्वारा आपातकाल पर बयानबाजीकेँ नजरअंदाज कयल जा सकैत छल। ओ आगू कहलनि जे ई पूर्णतः राजनीतिसँ प्रेरित छल।
ओम बिरला सदनमे आपातकालक निंदा कयने छलथि। लोकसभा अध्यक्ष चुनल गेलाक बाद बिरला १९७५ मे तत्कालीन प्रधानमंत्री इन्दिरा गाँधी द्वारा देशमे आपातकाल लगयबाक निन्दा कयने छलाह। एकर बाद सदनमे हंगामा भेल। बिरला कहने छलाह जे आपातकालक दौरान कांग्रेस सरकार विपक्षी नेतासभकेँ जेलमे राखि देलक आ मीडिया पर प्रतिबन्ध सेहो लगा देलक।
कांग्रेस सांसद केसी वेणुगोपाल राव लोकसभा अध्यक्ष ओम बिड़लाकेँ पत्र लिखने छथि। पत्रमे कहल गेल अछि जे लोकसभामे आपातकाल पर जाहि तरहें बयानबाजी कयल गेल, ओ संसदीय परम्पराक उपहास अछि। वेणुगोपाल एहि मुद्दा पर चिंता व्यक्त कयने छथि।
