कोनो माईक लाल नहिं कऽ सकैछ सीएए समाप्त : नरेन्द्र मोदी

आजमगढ़
*

प्रधानमंत्री नरेन्द्र मोदी इंडिया गठबन्धन पर पैघ हमला कयलनि अछि। ओ कहलनि जे सपा आ कांग्रेस दूटा दल अछि, मुदा दोकान एके अछि। प्रधानमंत्री मोदी बृहस्पति दिन आजमगढ़क लालगंज क्षेत्रक निजामाबादमे एकटा चुनावी जनसभाकेँ सम्बोधित कऽ रहल छलाह।

एहि अवसर पर ओ कहलनि जे इंडी गठबंधन तुष्टीकरणक दलदलमे पूर्ण रूपसँ डूबि गेल अछि। समाजवादी पार्टीक शीर्ष नेता सभ दिन राम मन्दिरक विषयमे जखनि-तखनि घटिया गप्प करैत रहैत छथि। कांग्रेसक शहजादा तऽ राम मंदिरकेँ गारि देबाक मिशने शुरू कऽ देने छथि।

पीएम मोदी कहलनि कि सपा आ कांग्रेस दल दूटा अछि, मुदा दोकान एक अछि। ओ सभ झूठक सामान बेचैत छथि, ई तुष्टीकरण, भाई-भतीजावाद आ भ्रष्टाचारक सामान बेचैत अछि।

मोदी आगू कहलनि “दस साल पहिने भारत पहचान आ विश्वासक संकटसँ जूझि रहल छल। सबकेँ सुरक्षाक खतरा महसूस भऽ रहल छल। विकास कांग्रेसक भ्रष्टाचारक भेंट चढ़ि चुकल छल। दुनियामे कतहु कोनो घटना होएत छल त ओकर संग आजमगढ़क नाम जुड़ैत रहैत छल, मुदा पिछला १० सालमे दुनियामे आजमगढ़क नाम आगू बढ़ल अछि। एतय १० सालमे आतंकवाद आ नक्सलवाद पर अंकुश लागल अछि।

ओ कहलनि जे सपा-कांग्रेस, इंडी गठबंधन देशकेँ जातिक आगिमे धकेल देलक अछि।

पीएम मोदी कहलखिन, जे करए चाहैत छी से करू। हमहूँ मैदानमे छी, अहाँ सेहो छी। अहाँ सभक सहयोगसँ देश विकासक पथ पर अग्रसर अछि। अहाँ सभ एसपी केर गुंडाराजक पुरान दिन देखने छी। बाजार साँझ ७ बजे बंद भऽ जाइत छल। माय आ बहिन बाहर नहिं निकलि पाबैत छलीह। मुदा आइ भाजपा सरकारक अधीन उत्तर प्रदेश एहि सभ संकटसँ बाहर अछि। हमर स्वच्छता अभियान उत्तर प्रदेशमे योगी आदित्यनाथ द्वारा सतत चलायल जा रहल अछि।

ओ कहलनि जे पहिने दंगा करयवला आतङ्कीसभकेँ छोड़ि देल जाइत छल। दस साल पहिने एकटा आम आदमीक सुरक्षा भगवान भरोसे होइत छल। देशमे जतय कतहु विस्फोट होइत छल, लोकक ध्यान आजमगढ़ दिस आकृष्ट होइत छल । तखनि सपाक शहजादा आतंकक समर्थनमे आतंकीक सम्मान करैत छलाह, दंगा करय वाला आतंकवादीकेँ छोड़ि देल जाइत छल।

पीएम मोदी कहलनि कि सपा प्रमुख अखिलेश यादव अपनाकेँ यदुवंशी कहैत छथि। अहाँ यदुवंशी केना छी, जाहि व्यक्तिक संग अहां बैसल छी, ओ राम मंदिरकेँ गारि देबाक मिशन शुरू कऽ देने अछि।

प्रधानमंत्री नरेन्द्र मोदी एक बेर फेर विपक्षी दल पर निशाना साधलनि। ओ कहलनि जे कोनो माईक लाल सीएए देशमे समाप्त नहिं कऽ सकैत अछि। देशक प्रत्येक नागरिककेँ पता चलल अछि जे विपक्षी दल हिन्दू-मुस्लिम कऽ अपन वोट बैंक तैयार कयलक अछि। मोदी हुनकर नकाब उतारि देलक अछि।

मध्य प्रदेशक मुख्यमंत्री मोहन यादवक नाम लैत पीएम मोदी उदाहरण दैत कहलनि जे हुनका देखू, मात्र वोटक राजनीति लेल अहाँ जँका ओ काज नहिं करैत छथि।

ओ कहलनि जे पहिने चुनाव आबैत छल तऽ हड़ताल होइत छल, आतंकवादी धमकी दैत छल, मुदा एहि बेर श्रीनगरमे पछिला कतेको चुनावक रिकॉर्ड टूटि गेल। देशक जनता जानि गेल कि अहाँ सभ वोट बैंकक राजनीति कय कऽ, हिन्दू-मुस्लिमकेँ लड़ा कय सेक्युलरिज्मक एहेन चोला पहिरने छलौंह कि सच सामने नहिं आबि रहल छल, मुदा मोदी अहांक सच्चाईकेँ उजागर कऽ देलक अछि।