ई घटना नदी थाना क्षेत्रक बेला सड़क मोड़ लग भेल। बाइक चालककेँ गिरफ्तार कs लेल गेल अछि। रविदिन राति पुलिस टीम सुपौलक नदी थाना क्षेत्रक बेला मोड़ लग वाहनक जाँच कऽ रहल छल। एम्हर तेज गतिसँ आबि रहल एकटा बाइक सड़कक कातमे ठाढ़ गश्ती पुलिसकर्मीकेँ ठोकर मारि देलक। बाइकक गति बेसी छल। तीन पुलिसकर्मी घायल भए गेलाह आ खसि पड़लाह। घायल पुलिसकर्मीसभकेँ अनुविभागीय अस्पताल निर्मलीमे भर्ती कयल गेल। प्राथमिक उपचारक बाद दूटा पुलिसकर्मीकेँ नीक इलाजक लेल बाहर रेफर कऽ देल गेल। एहि दुर्घटनामे दूटा पुलिसकर्मी बेसी घायल भेल छथि, जिनका रेफर कयल गेल अछि।
घटनाक सूचना भेटैत निर्मली एसडीपीओ राजू रंजन कुमार सहित अन्य पुलिस अधिकारी सेहो अस्पताल पहुँचलाह आ घायल पुलिसकर्मीक हालचाल पूछलनि। एहि घटनामे गजाधर प्रसाद आ राजेश कुमार गम्भीर रूपसँ घायल भऽ गेलाह जखन कि राकेश पासवान चोटिल भऽ गेलाह। निर्मली एसडीपीओ राजू रंजन कहलनि जे ई घटना गश्तीक दौरान भेल।
