बिहारमे एनडीए केँ ९ सीटक नुकसान भेल अछि। एतय एनडीए पछिला सालक तुलनामे मात्र ३० सीट जीत सकल। सभ ४० सीट जीतबाक दावा एहि बेर सेहो पूरा नहिं भऽ सकल।
लोकसभा चुनावक परिणामक बाद बिहारमे चर्चाक बाजार गर्म अछि, किएक तँ २०१९ मे ४० सीटमे सँ ३९ सीट जीतनिहार एनडीए एहि बेर २०२४ मे घटि कऽ ३० सीट पर आबि गेल अछि। एनडीएकेँ ९ सीटक नुकसान भेल अछि। भाजपा ५ सीट हारि चुकल अछि आ जेडीयू चारिटा सीट हारि चुकल अछि, जखन कि एकटा सीट पर चुनाव लड़निहार उपेन्द्र कुशवाहाक सेहो सफाया भऽ चुकल अछि।
सबसँ पैघ बात ई अछि जे लोकसभा सांसद आरके सिंहकेँ जे भाजपाक केंद्रीय मंत्री छलाह हारिक सामना करय पड़ल तऽ अश्विनी चौबे केर टिकट काटि मिथिलेश तिवारीकेँ बक्सरमे मौका देब सेहो भाजपाकेँ बहुत महंग पड़ल। राजधानी पटनामे सेहो भारतीय जनता पार्टीकेँ पराजयक सामना करय पड़ल अछि। पाटलिपुत्र लोकसभा सीटसँ २०१४ सँ लगातार दू बेर सांसद रहल रामकृपाल यादव सेहो चुनाव हारि गेलाह। बिहारक चित्तौड़गढ़ कहायवाला लगातार दू बेर औरंगाबाद लोकसभा सीट जीतनिहार सुशील सिंहकेँ सेहो पराजयक सामना करय पड़ल अछि।
सासाराम लोकसभा सीटसँ भाजपा उम्मीदवार शिवेश राम सेहो चुनाव हारि गेलाह। मुख्यमंत्री नीतीश कुमारक जनता दल (यूनाइटेड) सेहो चारिटा सीट हारि गेल, मुदा जेडीयूकेँ भाजपासँ कम नुकसान भेल। भाजपा एहि बेर १७ सीटपर चुनाव लड़ने छल, जखन कि जदयू १६ सीटपर चुनाव लड़लक। एहि तुलनामे सेहो जेडीयूकेँ भाजपासँ कम नुकसान भेल अछि। जदयू चारिटा सीट – किशनगंज, कटिहार, पूर्णिया आ जहानाबाद हारि गेल, जाहिमे सँ एकटा सीट किशनगंज ओ २०१९ मे सेहो हारि गेल छल।
एकर अतिरिक्त २०१९ मे जहानाबाद लोकसभा सीटसँ मात्र १७०० वोटसँ जीति चुकल चण्डेश्वर प्रसाद एहि बेर १४२५५९१ मतसँ हारि गेलाह। कटिहारसँ दुलालचन्द गोस्वामी आ पूर्णिया लोकसभा सीटसँ दू बेर सांसद रहल संतोष कुशवाहा सेहो चुनाव हारि गेलाह। बिहारमे एनडीए ४० सीटमे सँ ३० सीट जीतल अछि। एहिमेसँ भाजपा १२, जेडीयू १२, लोक जनशक्ति पार्टी रामविलास पांचो सीट आ हिन्दुस्तानी अवाम मोर्चा एकटा सीट जितलक।
भाजपा जे १२ लोकसभा सीट जीतल अछि ओहिमे पश्चिम चम्पारणसँ डॉ. संजय जायसवाल, पूर्वी चंपारणसँ राधा मोहन सिंह, अररियासँ प्रदीप कुमार सिंह, महाराजगंजसँ जनार्दन प्रसाद सिगरीवाल, सारणसँ राजीव प्रताप रूडी, उजियारपुरसँ नित्यानंद राय, बेगूसरायसँ गिरिराज सिंह, नवादासँ विवेक ठाकुर, मधुबनीसँ अशोक यादव, दरभंगासँ गोपाल जी ठाकुर शामिल छथि। मुजफ्फरपुरसँ राजभूषण चौधरी आ पटना साहिबसँ रविशंकर प्रसाद भाजपाक टिकट पर चुनाव जीतलनि।
जदयू द्वारा जीतल १२ लोकसभा सीट पर सीवानसँ विजयलक्ष्मी देवी, बांकासँ गिरधारी यादव, बाल्मीकि नगरसँ सुनील कुमार, सीतामढ़ीसँ देवेश चन्द्र ठाकुर, झंझारपुरसँ रामप्रीत मंडल, सुपौलसँ दिलेश्वर कामत, मधेपुरासँ दिनेश चन्द्र यादव, गोपालगंजसँ डॉ. आलोक सुमन, भागलपुरसँ अजय कुमार मंडल, मुंगेरसँ राजीव रंजन आ मुंगेरसँ ललन सिंह छथि। नालंदासँ कौशलेन्द्र कुमार आ शिवहरसँ लवली आनन्द चुनाव जीति चुकल छथि। हिन्दुस्तानी अवाम मोर्चाक सुप्रीमो जीतन राम माँझी, जे मात्र एकटा सीटपर चुनाव लड़लनि, सेहो गया लोकसभा सीटसँ जीतबामे सफल रहलाह।
चिराग पासवानक पार्टी लोक जनशक्ति पार्टी रामविलासकेँ सबसँ बेसी लाभ भेल अछि। लोक जनशक्ति पार्टीक स्वयं चिराग पासवान १७०१०५ मतसँ चुनाव जीतलनि, जखन कि अपन पार्टीमे सबसँ बेसी मतसँ चुनाव जितनिहार बिहार सरकारक मंत्री अशोक चौधरीक बेटी शाम्भवी चौधरी १८७५३७ मतसँ चुनाव जितलीह। एकर अतिरिक्त चिराग पासवानक बहनोई अरुण भारती जमुईसँ चुनाव जीति चुकल छथि। खगड़ियासँ राजेश वर्मा आ वैशालीसँ वीणा देवी लगातार दोसर बेर लोक जनशक्ति पार्टी (लोजपा) राम विलास सीट जीतलीह।
