राजनीतिक दलक नेता दिल्ली विधानसभा चुनाव २०२५क लड़ाई जीतबाक लेल मतदाताकेँ आकर्षित करबाक कोनो मौका नहि छोड़ि रहल छथि। एहि राजनीतिक उथल-पुथलक बीच भारतीय जनता पार्टी (भाजपा) सेहो दिल्लीमे जीतबाक लेल तैयार भऽ गेल अछि।
सूत्रक अनुसार, भारतीय जनता पार्टी (भाजपा) दिल्लीमे उपभोक्ता लेल प्रति माह ३०० यूनिट धरि मुफ्त बिजलीक घोषणा कऽ सकैत अछि। एकर अतिरिक्त धार्मिक स्थल पर सेहो ५०० यूनिट मुफ्त बिजलीक घोषणा कयल जा सकैत अछि। भाजपा दिल्लीमे लाडली बहना योजना जकाँ महिलासभक लेल एकटा विशेष योजनाक घोषणा सेहो कऽ सकैत अछि। एहि योजनाक उद्देश्य एहि क्षेत्रक महिलासभकेँ सशक्त बनायब अछि। संगहि भाजपा पाइपलाइनसँ मुफ्त स्वच्छ पानि देबाक वचन सेहो दऽ सकैत अछि।
दिल्लीमे सत्तारूढ़ आम आदमी पार्टी (आप) आ कांग्रेस मतदाताकेँ लुभाबय लेल कतेको योजनाक घोषणा कयलक अछि। आम आदमी पार्टी (आप) दिल्लीमे महिला आ बुजुर्ग, ऑटो चालक एवं पूजारी-ग्रन्थि सभकेँ साधय लेल कतेको पैघ योजनाक घोषणा कयलक अछि।
दिल्ली विधानसभा चुनाव जीतला पर आम आदमी पार्टी (आप)क घोषणामे बुजुर्गक लेल संजीवनी योजना, महिलाकेँ २,१०० रुपैया, ऑटो चालकक लेल १० लाख टाकाक बीमा, पुजारी आ पुरोहितक लेल १८,००० रुपैया वेतन सहित कतेको वादा सम्मिलित अछि।
संगहि कांग्रेस सेहो मतदाताकेँ लुभाबयमे कोनो कसरि नहि छोड़लक अछि। कांग्रेस दिल्लीमे महिलासभक लेल ‘प्यारी दीदी योजना’क वादा सेहो कयलक अछि। कांग्रेसक कहब अछि जे जँ पार्टी सत्तामे अबैत अछि तँ ई योजना पहिल कैबिनेट बैसारमे लागू कयल जायत। एकर अतिरिक्त कांग्रेस दिल्लीमे ‘जीवन रक्षा योजना’क घोषणा सेहो कयलक अछि। एहि योजनाक अन्तर्गत २५ लाख रुपया धरि बीमा कवर अछि।
७० सदस्यीय दिल्ली विधानसभाक चुनाव ५ फरवरीकेँ होयत आ परिणाम ८ फरवरीकेँ घोषित कयल जायत।
