राज्यमे बिहारकेँ विशेष दर्जा देबाक माँग तेज भऽ रहल अछि। राजगक हिस्सा जेडीयू एक बेर फेर एहि माँग पर मुखर भऽ गेल अछि, जखन कि केन्द्रीय मंत्री जीतन राम मांझी शनिदिन जेडीयूकेँ इशारामे कहलनि जे बिहारकेँ विशेष राज्यक दर्जा नहिं देल जा सकैत अछि।
हिन्दुस्तानी अवाम मोर्चाक प्रमुख जीतन राम माँझी शनिदिन कहलनि जे नीति आयोग पहिनेसँ स्पष्ट रूपसँ एहि बातसँ इनकार करैत कहि चुकल अछि जे कोनो राज्यकेँ विशेष राज्यक दर्जा नहिं भेटि सकैत अछि। एहेनमे इ मांग उचित नहिं अछि।
हाजीपुरमे संवाददाता सभकेँ संग चर्चाक दौरान ओ बिहारकेँ विशेष राज्यक दर्जासँ जुड़ल सवाल केर जवाबमे कहलनि, “नीति आयोग स्पष्ट रूपसँ मना कऽ देलक अछि, आब कियो कतबो माथा पीटथि, ई उचित नहिं अछि। ओना ओ कहलनि जे प्रधानमंत्री नरेन्द्र मोदी बिहारक विकासक लेल जे योजना आ धनक आवश्यकता होयत से देताह।
उल्लेखनीय अछि जे जेडीयू नेता आइ-काल्हि बिहारक विशेष राज्यक दर्जा भेटबाक समर्थनमे लगातार बयान दऽ रहल छथि। ओना दू दिन पहिने जदयू नेता आ बिहार मंत्री विजय कुमार चौधरी कहने छलाह जे बिहारकेँ विशेष दर्जा देबामे अगर कोनो बाधा आबि रहल अछि तऽ विशेष पैकेज देल जेबाक चाही।
