हम चुनावेमे कहने रही जे नीतीश कुमारकेँ सीएम नहिं रहल देत जाएत: तेजस्वी यादव

पटना । समदिया

तेजस्वी यादव कहलनि जे आगाँ के के CM बनत आ के नहि बनत, मुदा जनता जकरा चाहैत अछि, ओ मुख्यमंत्री बनिये नञि रहल अछि तऽ फेर की मतलब रहि जाइत अछि।

मुख्यमंत्री नीतीश कुमार राज्यसभाक सदस्यक रूपमे शुक्रकेँ (10 अप्रैल, 2026) शपथ लेलनि। एहि पर नेता प्रतिपक्ष तेजस्वी यादव अपन प्रतिक्रिया देलनि। तेजस्वी यादव कहलनि जे प्रश्न एहिमे अछि जे एतेक पैघ जनादेश भेटलाक बादो सरकारमे परिवर्तन आखिर किएक कएल जा रहल अछि ? जँ हुनकर (नीतीश कुमार) इच्छा होइत तऽ चुनावक पहिने सेहो ओ कहि सकैत छलाह। अनचोकेमे सीएम केर वोट लेबाक पछाति हुनकर इच्छा नहि जागल होएत।

तेजस्वी यादव कहलनि जे, “हुनकर इच्छा तऽ छलैने नहिं जे हुनका पर थोपल गेल अछि, जे बात सभ आबि रहल अछि। चुनावेमे हम पहिने कहने रही जे नीतीश कुमारकेँ मुख्यमंत्री नहि रहय देल जायत। तखनि एनडीए केर नेता कहैत छलाह 25 सँ 30 फेर सँ नीतीश, तँ ओ लोकनि तऽ झूठ बाजलन्हि अछि।”

राज्य सरकार पर आक्रमण करैत तेजस्वी यादव कहला जे बिहारक स्थिति बदसँ बदतर भए रहल अछि, लोक उपटि रहल अछि, हुनका लेल सरकार कोन व्यवस्था कएलक अछि ? एहि लोकक बस काजे इएह अछि जे भाड़मे जाए बिहार, मुदा हुनकर कुर्सी बचल रहए। ई लोक काज करैवाला लोक नहि अछि। बिहारकेँ नाश कऽ रहल अछि।

तेजस्वी यादव सवाल उठौलनि जे आगाँ के मुख्यमंत्री बनत आ के नहि बनत, मुदा जनता जेकरा चाहि रहल अछि, ओ मुख्यमंत्री बनि नहि रहल अछि तखन फेर की मतलब रहि जाइत अछि। जे केओ मुख्यमंत्री बनत, सरकार दिल्लीसँ चलत।

आगा तेजस्वी यादव कहला जे नीतीश कुमारक कखनो केओ हाथ खींचैत अछि, कखनो केओ पएर पकड़ैत अछि, कखनो केओ कुर्ता घीचैत अछि। कतेक दबाव अछि हुनका पर। पछुलका वीडियो फुटेजसँ पता चलि जाइत अछि। जखनि नीतीश कुमार सदनमे भाषण दैत छथि तऽ लाइन काटि देल जाइत अछि। कखनो पाछूसँ केओ कनहा पकड़ैत अछि, कखनो केओ मुख्यमंत्रीक हाथ निच्चा कऽ दैत अछि। हुनका कतबा अपमानित कएल गेल अछि।