हमरा बिहारमे सेहो किछु नीक समाचारक आस: रविशंकर

पटना । समदिया

भाजपा नेता रविशंकर प्रसाद कहलनि जे 1984 केर लोकसभा चुनावक बादसँ पार्टी बहुत नमहर सफर तय कयने अछि, जतए ओहि समयमे केवल 2 सीट जीतल गेल छल। प्रधानमंत्री नरेंद्र मोदीक नेतृत्वमे भाजपा लगातार मजबूत भ’ रहल अछि।

बिहारमे नव सरकारक गठनक लेल कतेको दिनसँ सियासी हलचल तेज अछि। एहि बीच पूर्व केंद्रीय मंत्री रविशंकर प्रसाद राज्यमे भाजपा नेतृत्वमे नव सरकार बनबाक उम्मीद जतौलनि। ओ सोम (06 अप्रैल) केँ कहलनि जे पार्टी बिहारमे ‘नीक खबरि’क प्रतीक्षामे अछि, जतए मुख्यमंत्री नीतीश कुमारक इस्तीफाक बाद नव सरकार बनबाक संभावना अछि।

पटना साहिबक सांसद भाजपा प्रदेश मुख्यालयमे पार्टीक 47म स्थापना दिवस पर आयोजित कार्यक्रममे ई बात कहलनि।

रविशंकर प्रसाद कहलनि, ‘1984क लोकसभा चुनावक बादसँ हम सभ बहुत नमहर सफर तय कयने छी, जतए हम केवल दू सीट जीतने रही। प्रधानमंत्री नरेंद्र मोदीक नेतृत्वमे हम लगातार मजबूत भ’ रहल छी। बिहारमे सेहो हम नीक खबरिक आस करैत छी।”

हुनक ई बयान ओहि समयमे आयल अछि, जखनि जदयू प्रमुख आ सबसँ नमहर समय धरि मुख्यमंत्री रहला नीतीश कुमार राज्यसभा लेल निर्वाचित भ’ चुकल छथि। कुमार गेल सप्ताह राज्य विधान परिषदक सदस्यता छोड़ि देने छथि आ जल्दीए राज्यसभा सांसदक रूपमे शपथ लेबाक संभावना अछि। एहेन अटकल लगाओल जा रहल अछि जे 75 वर्षीय नेता अगिला सप्ताह धरि सत्ता छोड़ि सकैत छथि आ भाजपासँ कियो मुख्यमंत्री बनाओल जा सकैत अछि।

बिहारमे गत साल नवंबरमे भेल विधानसभा चुनावमे भाजपा सबसँ पैघ पार्टी बनि क’ उभरल छल। बिहार एकमात्र एहेन राज्य अछि जतए भाजपासँ मुख्यमंत्री नहि बनल अछि। जँ सब ठीक रहल, त’ नीतीश कुमारक इस्तीफाक बाद भाजपासँ कियो नेता मुख्यमंत्री बनाओल जा सकैत अछि।

पूर्व केंद्रीय मंत्री रविशंकर प्रसाद ई सेहो कहलनि, “असममे हम आरामसँ सत्तामे रहब। पश्चिम बंगालमे हम सत्ता हासिल करब। तमिलनाडुमे एनडीए सरकार बनत, आ केरलमे भाजपा पहिनेसँ बेसी मजबूत भ’ क’ उभरत।” भाजपा कार्यक्रममे उपमुख्यमंत्री सम्राट चौधरी सेहो मौजूद रहलाह। बिहारमे संभावित सत्ता परिवर्तनक बीच हुनका मुख्यमंत्री पदक मजबूत दावेदार मानल जा रहल अछि।