केंद्र सरकार द्वारा आनल गेल वक्फ संशोधन विधेयकक विरोधमे शनिदिन दरभंगाक सड़क पर भारी प्रदर्शन भेल। मदरसा हमीदिया किलाघाटसँ लहेरियासराय तक मुस्लिम समुदायक हजारों महिला आ पुरुष सड़क पर उतरल। बैनर आ पोस्टर लs कs प्रदर्शनकारी नव कानून केर कारी कानून कहि रहल छलथि आ सरकारसँ एकरा तुरंत वापस लेबाक मांग कs रहल छलथि।
प्रदर्शनक नेतृत्व कांग्रेस नेता आ दरभंगा नगर निगमक डिप्टी मेयर नाजिया कयलनि। ओ सीधा केंद्रमे नरेंद्र मोदी सरकार पर आरोप लगाबैत कहलनि जे इ सरकार लगातार मुसलमानकेँ निशाना बना रहल अछि। ओ कहलनि जे पहिने सीएए आ एनआरसी, फेर ट्रिपल तलाक आ आब वक्फ संशोधन कानून। हर बेर मुसलमानक धार्मिक, सामाजिक आ संवैधानिक स्वतंत्रता केर सीमित करय केर कोशिश भs रहल अछि, ओ कहलनि कि एहि कानूनसँ मुसलमानक संपत्ति आ वक्फ केर जमीन पर कब्जाक रास्ता खोललक अछि, जेकरा कोनो भी हालतमे बर्दाश्त नहि कयल जायत।
उपमेयर नाजिया विरोध प्रदर्शनक दौरान अपन भाषणमे कहलनि जे ई कानून मुसलमानक धार्मिक स्वतंत्रतामे हस्तक्षेप अछि। ओ कहलीह जे वक्फक संपत्ति समुदायक विकास आ जरूरतमंदक मददिक लेल अछि, मुदा सरकार आब ओकरा अपना हाथमे लेबय चाहैत अछि। ओ चेतावनी देलनि जे जँ ई कानून वापस नहि लेल गेल तऽ सीएए आओर एनआरसी सन पैघ आंदोलन शुरू होएत, महिला अनिश्चित कालक हड़तालक लेल तैयार छथि।
एहि विरोध मार्चक खास बात ई छल जे एहिमे मुस्लिम महिलाक काफी भागीदारी देखल गेल, सभ गोटे सर्वसम्मतिसँ वक्फ एक्टक ‘काला कानून’ बतेलथि आ एकरा मुस्लिम समुदायक खिलाफ साजिश कहलथि। सड़क पर उतरयवाली महिला सरकारक खिलाफ नारा लगा रहल छलीह आओर एहि कानूनकेँ तुरंत निरस्त करय केर मांग कs रहल छलीह।
सभाकेँ संबोधित करैत विरोध मार्चक संयोजक नफीसुल हक रिंकू कहलनि जे ई कानून मुसलमानक जमीन हड़पबाक साजिश अछि। ओ आरोप लगौलनि जे सरकार जानि-बुझि कए शरीयतमे हस्तक्षेप कs रहल अछि। ओ स्पष्ट कयलथि जे जँ सरकार एहि विधेयक केर वापस नहि लेत तऽ चरणबद्ध तरीकासँ इ आंदोलन देश भरिमे पसारल जायत। प्रदर्शनकारी दरभंगा जिला मुख्यालय पहुंचि एकटा जनसभाके आयोजन कयलनि, जाहिमे वक्ता लोकनि वकफ कानूनक खामीके विस्तारसँ गिनती करौलनि आ एकर प्रभावसँ मुस्लिम समुदायक भेल नुकसानक जानकारी देलनि।
प्रदर्शनक दौरान बेर-बेर ई बात दोहराओल गेल जे देशक मुसलमान आब चुप नहि रहत, ओकर धार्मिक, सामाजिक आ आर्थिक स्वतंत्रता केर प्रभावित करय वाला हर कानूनक विरोध करत। उपमेयर कहलनि जे, ई मात्र राजनीतिक मुद्दा नहि अपितु अस्तित्व आ अधिकारक प्रश्न अछि। एहि विरोध प्रदर्शनसँ मात्र दरभंगेमे नहि बल्कि पूरा राज्यमे वक्फ कानूनक खिलाफ नव आंदोलनक जमीन तैयार भs गेल अछि। प्रदर्शनकारी चेतावनी देलनि जे जँ हुनकर मांग पूरा नहि भेल तs ई विरोध नहि रुकत।
