वक्फ संशोधन बिल पर बिहारक राज्यपाल आरिफ मोहम्मद खान कहलाह जे वक्फ सम्पतिक उपयोग मात्र मुसलमान सभक भलाई लेल नै अछि। ई हर एकटा व्यक्तिक लेल अछि जे गरीब अछि, निर्धन अछि, जिनका सहाराक आवश्यकता अछि।
बिहारक राज्यपाल आरिफ मोहम्मद खान वक्फ संशोधन बिल पर ताजा बयानमे कहलाह जे वक्फ बोर्डमे सुधार केर बहुत आवश्यकता छल आ वक्फ संशोधन बिल संसदसँ पास भेलाक बाद नव कानूनक रूप लेबऽ जा रहल अछि, ई सुधार केर दिशामे सही डेग अछि।
ओ मीडियाकर्मी सभक सवाल सभक उत्तर दैत कहलाह जे पटनामे सेहो कतेको वक्फ सम्पति अछि मुदा एकर माध्यमसँ कतेक अस्पताल, स्कूल वा अनाथालय बनाओल गेल, कनी नाम बता दिअ ?
आरिफ मोहम्मद खान कुरानक आयातकेँ जिक्र करैत वक्फ केर अर्थ बुझौलाह। ओ कहलाह जे वक्फ सम्पतिक उपयोग मात्र मुसलमान सभक भलाई लेल नै अछि। ई हर एकटा व्यक्ति लेल अछि जे गरीब अछि, निर्धन अछि, जिनका सहाराक आवश्यकता अछि।
ओ कहलनि जे जखनि हम यूपीमे मंत्री छलहुँ, तऽ किछु समयक लेल हम वक्फ विभागक सम्हारने छलहुँ। हर समय हमरा एहेन लोकसँ भेट होइत छल, जिनकर संपत्ति केर मामिला चलि रहल छल।
ओ आगू कहलथि, वक्फ प्रॉपर्टी लोकक कल्याणक लेल छल। मुदा की लोकक कल्याण भ’ हल रहल छल ? आरिफ मोहम्मद खान कहलथि जे पटनामे कतेको वक्फ संपत्ति अछि, मुदा पटनामे वक्फ केर तहत कोनो एकटा अस्पताल वा अनाथालयक नाम कहू ? ओतए मात्र मामिला दर्ज कयल जा रहल अछि। तेँ एहिमे बहुत सुधारक आवश्यकता छल। आ ई वक्फ संशोधन विधेयक एहि दिशामे एकटा डेग अछि जे जल्दीए कानून बनय जा रहल अछि।
जनतब जे संसदक दुनू सदन लोकसभा आ राज्यसभासँ वक्फ संशोधन विधेयक 2025 केर मंजूरी भेटि चुकल अछि। आब राष्ट्रपतिक हस्ताक्षर होइते ई बिल कानूनक रूप लऽ लेता। दुनू सदनमे एहि बिल पर लंबा चर्चा भेल। राज्यसभामे एहि बिलक समर्थनमें कुल 128 वोट पड़ल जखनिकि विरोधमे 95 वोट पड़ल। तहिना एतए पहिने लोकसभामे सेहो एहि बिल पर लंबा चर्चा भेल। लोकसभामे एहि बिलक समर्थनमे 288 वोट पड़ल, जखनिकि एकर विरोधमे 232 मत पड़ल।
केंद्रीय अल्पसंख्यक कार्य मंत्री किरेन रिजिजू कहलथि जे अल्पसंख्यकक लेल दुनियामे भारतसँ सुरक्षित कोनो स्थान नहि अछि आ एहि देशक बहुसंख्यक लोक स्वयंकें धर्मनिरपेक्ष मानैत छथि। रिजिजू सरकारक एहि कदमकें मुस्लिम विरोधी कहबाक कतेको विपक्षी सदस्यमंडलीक दावाकेँ खारिज कएलन्हि आ कहलथि जे एहि विधेयककेँ मुसलमानकेँ बाँटए वला कहल जा रहल अछि, जखनकि सरकार एकर माध्यमसँ शिया, सुन्नी समेत समुदायक सभ वर्गकेँ एक संग आनि रहल अछि। ओ कहलथि जे प्रधानमंत्री नरेन्द्र मोदीक सरकार त’ देशक सबसँ छोट अल्पसंख्यक समुदाय पारसीकेँ सेहो बचाबए लेल प्रयास कऽ रहल अछि।
