वांछित शराब माफिया राजा साहकेँ एसटीएफ मुजफ्फरपुर रेलवे स्टेशनसँ बनौलक बंदी
मुजफ्फरपुर । समदिया
बिहारक मोतिहारी जिलामे जहरीला शराब पीबाक कारण 10 गोट लोकक मौत आ कतेको गोटेक बीमार भ’ गेलाक बाद पुलिस आब शराब माफियाक खिलाफ सख्त कारवाईमे जुटल अछि। एहि बीच विशेष कार्य बल (एसटीएफ) मुजफ्फरपुर जिलाक हथौड़ी थाना क्षेत्रक वांछित आ कुख्यात शराब माफिया राजा साह उर्फ राजा गुप्ताकेँ मुजफ्फरपुर रेलवे स्टेशन परिसरसँ बंदी बना लेलक।
पुलिस एहि गिरफ्तारीकेँ अवैध शराबक खिलाफ चलि रहल अभियानके एकटा पैघ सफलता मानि रहल अछि। जानकारीक अनुसार पुलिसकेँ गुप्त सूचना भेटल छल जे नमहर समयसँ फरार चलि रहल राजा साह मुजफ्फरपुर रेलवे स्टेशन लग मौजूद अछि। एहि आधार पर मंगल राति देरसँ एसटीएफ टीम जाल बिछा क’ स्टेशन परिसरमे छापेमारी क’ ओकरा धरि दबोचलक।
गिरफ्तार अपराधी हथौड़ी थाना क्षेत्रक बेरई गामक निवासी अछि। पुलिस अधिकारी बुधदिन जानकारी देलनि जे राजा साह पर मुजफ्फरपुर जिलाक विभिन्न थानामे 16 सँ अधिक मामिला दर्ज अछि। ओकरा पर शराब तस्करीक संग-संग आर्म्स एक्टक तहत सेहो गंभीर आरोप दर्ज अछि। ई हथौड़ी थाना कांड संख्या 219/25 अंतर्गत बिहार मद्य निषेध आ उत्पाद अधिनियमक धारा 30(ए) मे वांछित छल।
पुलिस ओकरा लगसँ 10,695 रुपैया नगद, दूटा मोबाइल, तीनटा सिम कार्ड आ दूटा क्रेडिट कार्ड बरामद कयलक अछि। पुलिस आब बंदी आरोपीसँ पूछताछ क’ रहल अछि, जाहिसँ पता चलि सकय जे ओकर नेटवर्कमे आरो के-के लोक शामिल अछि आ बरामद सिम कार्डक उपयोग कोन-कोन आपराधिक गतिविधिमे कएल जा रहल छल।
उल्लेखनीय अछि जे मोतिहारी जिलामे कथित रूपसँ माहूरवाला शराब पीबाक कारण 10 गोट लोकक मौत भ’ गेल अछि। एहि घटनाक बाद पुलिस राज्य भरिमे शराब तस्करक खिलाफ अभियान तेज क’ देने अछि। बिहारमे 2016 सँ शराबबंदी कानून लागू अछि, जकर बादसँ एहि मुद्दा पर लगातार राजनीति सेहो होइत रहल अछि।
