तेसर चरणक 54 उम्मीदवारक भाग्य ईवीएम मे बंद
*
कार्यालय समदिया
*
लोकसभा चुनावक तेसर चरणक मतदान मंगलदिन शांतिपूर्ण ढंगसँ संपन्न भेल। सख्त सुरक्षाक बीच चुनाव उत्सवक लेल भोरसँ लोक मतदान केन्द्रपर ठाढ़ छल। मिथिला क्षेत्रीय बिहारक झंझारपुर, सुपौल, अररिया, मधेपुरा आ खगड़ियाक पांच सीटक लेल 9,848 मतदान केंद्र पर मतदाता वोट देलखिन। एहि पाँच सीटपर कुल 54 उम्मीदवार छथि, जाहिमे तीनटा महिला आ 51 पुरुष छथि। जिनकर भविष्य ईवीएममे कैद भऽ गेल।
मिथिला क्षेत्रीय बिहारमे लोकसभा चुनावक तेसर चरणमे पाँच सीटपर साँझ 6 बजे धरि 60 प्रतिशत मतदाता अपन मताधिकारक प्रयोग कयलनि। बिहारक मुख्य निर्वाचन अधिकारी एच आर श्रीनिवास कहलनि जे ई अनुमानित आंकड़ा अछि। तेसर चरणमे सबसँ बेसी मतदान अररियामे भेल छल। जतय 62.50 प्रतिशत मतदाता वोट देलखिन। जखन कि सुपौलमे 62 प्रतिशत आ मधेपुरामे 61 प्रतिशत मतदाता लोकतंत्रक एहि पावनिमे भाग लेलनि। तहिना खगड़ियामे 58 प्रतिशत आ झंझारपुरमे 55.60 प्रतिशत मतदाता मतदान कयलनि।
तेसर चरणक कुल 54 उम्मीदवारमे सँ 19 निर्दलीय छथि जखन कि 21 उम्मीदवार अलग-अलग दलक छथि। प्रमुख दलसँ 14 गोट उम्मीदवार चुनाव लड़ि रहल छथि। एहिमेसँ तीनटा उम्मीदवार जेडीयू, एकटा भाजपा आ एकटा लोजपा (रा) पार्टीक उम्मीदवार छथि। राजदक तीन, वीआईपीक एकटा आ वाम दलक एकटा उम्मीदवार चुनाव मैदानमे छथि। मायावतीक बहुजन समाज पार्टी पांचो सीटपर अपन उम्मीदवार उतारलक। मंगल दिन एहि सबहक भविष्य ईवीएममे कैद भऽ गेल।