निर्वाचन आयोग मतदाता सूचीक ड्राफ्ट जारी कय देलक अछि। आब सभ मतदाता एहि सूचीमे अपन नाम चेक कय सकैत छथि। जिनकर नाम एहि सूचीमे नहि अछि ओ 1 सितंबर धरि नाम जोड़बाबय लेल आवेदन कय सकैत छथि।
निर्वाचन आयोग बिहारमे मतदाता सूचीक पहिल मसौदा जारी कय देलक अछि। मतदाता सूचीक ड्राफ्ट बिहारके सभ 38 जिलाक मान्यता प्राप्त राजनीतिक दलकेँ सौंपल गेल अछि। ई मसौदा चुनाव आयोगक वेबसाइट पर सेहो देखल जा सकैत अछि। जिनकर नाम पहिल मतदाता सूचीमे नहि अछि हुनका लेल चुनाव आयोग 1 सितंबर धरि शिविर लगाओत। ई शिविर बिना कोनो छुट्टीक भोर 10 बजेसँ सांझ 5 बजेधरि लगातार खुजल रहत। एहि शिविरमे फॉर्म भरि अपन नाम मतदाता सूचीमे शामिल करा सकैत अछि।
चुनाव आयोग 25 जुलाईकेँ विशेष गहन संशोधनक पहिल चरण पूरा कयने छल। एहि दौरान 7.24 मतदाताक सत्यापन कयल गेल। एकर बाद बृहस्पतिकेँ मतदाता सूचीक ड्राफ्ट जारी कयल गेल। कोनो व्यक्ति 1 सितंबर धरि अपन नाम मतदाता सूचीमे शामिल करा सकैत अछि, जँ नाम वा कोनो अन्य जानकारी गलत अछि तँ चुनाव आयोगकेँ एकर शिकायत कय सकैत अछि। एकर बाद चुनाव आयोग 30 सितंबरकेँ अंतिम मतदाता सूची जारी करत।
विशेष गहन रिपोर्टक चारि चरण अछि, जाहिमे पहिल चरण : 25 जुलाई तक 7.24 करोड़ मतदाताक सत्यापन। दोसर चरण : 1 अगस्तकेँ मतदाता सूचीक ड्राफ्ट जारी।तेसर चरण : 1 सितंबर तक शिकायत शिविर होएत। चारिम चरण : 30 सितंबरकेँ अंतिम मतदाता सूची जारी कयल जाएत।
ड्राफ्ट चुनाव आयोगक वेबसाइट पर उपलब्ध अछि। जनतब जे बिहारमे मतदाता सूचीसँ 65 लाख लोकक नाम हटा देल गेल अछि। एहिमे सँ 22 लाख मतदाताक मौत भऽ चुकल अछि। 36 लाख मतदाता पलायन कयने छथि वा गायब छथि। एकर संगहि एकसँ बेसी जगह पर 7 लाख मतदाताक नाम दर्ज कयल गेल छल। आब डुप्लिकेट नाम हटा देल गेल अछि।
