सम्भलमे हंगामाक दौरान पुलिस गोलीबारी नहि कयलक। पुलिस पर भेल गोलीबारीमे उपद्रवी सभक जान गेल अछि। दूटा लोकक शरीरमे गोलीक निशान भेटल अछि। गोली ओकर शरीरक पार निकलि गेल। ओतहि तेसर मृतकक शरीरमे ३१५ बोरक गोली भेटल अछि। ई सम्भलक एसपी कृष्ण कुमार बिश्नोईक कहब अछि। एसपी कहलनि जे पुलिस उपद्रवी सभकेँ नियंत्रित करबाक लेल पहिने आँसू गैसक गोला छोड़लक आ जखनि भीड़केँ नियंत्रित नहि कयल जा सकल तखनि रबरक गोली चलाओल गेल। ओही समय उपद्रवी सभ पुलिस पर गोली चला देलक।
उपद्रवी सभक गोलीबारीमे तीन गोटे मारल गेलाह। पोस्टमार्टम रिपोर्टसँ इ पता चलल अछि। दूटा आर लोकक मृत्युक कारण एखनि धरि पता नहि चलल अछि। एसपी कहलनि जे सीसीटीवी फुटेज जाँचल जा रहल अछि जतय उपद्रवी सभ हंगामा कयने छल। २५ सँ बेसी लोककेँ गिरफ्तार कएल गेल अछि। एहिमे दूटा महिला सेहो शामिल अछि। आओर पहचान कएल जा रहल अछि।
आयुक्त आंजनेय कुमार सिंह कहलनि जे सम्भलमे स्थिति पूर्णतः नियंत्रणमे अछि आ शहरमे शांति स्थापित अछि।मुदा, पुलिस एहेन काज करयवलाक खिलाफ कारवाई करबाक निर्णय लेलक अछि। आयुक्त इहो स्पष्ट कयलनि जे हिंसामे शामिल सभ अभियुक्तक विरुद्ध कठोर कारवाई कयल जायत आ हुनका सभकेँ बख्शल नहिं जायत। एतय तक कि हुनका सभ पर एनएसए सेहो थोपल जाएत। पोस्टमॉर्टम रिपोर्टक अनुसार, मृतकक मृत्यु देसी बन्दूकसँ भेल छल। पुलिस जाँच कऽ रहल अछि जे हिंसाक पाछाँ केकर हाथ छल। आयुक्त आश्वासन देलनि जे एहेन घटनाकेँ रोकबाक लेल सभ तैयारी कऽ लेल गेल अछि आ भविष्यमे एहेन कोनो घटना नहि होबय देल जायत। ओ हिंसामे युवासभक संलिप्तता पर सेहो सवाल उठौलनि आ कहलनि जे उकसावाक बाद ओ सभ घटनास्थल पर पहुँचलाह।
