पछिला किछु दिनसँ चलि रहल अटकलकेँ समाप्त करैत ओलम्पिकमे देशक प्रतिनिधित्व कयनिहार पहलवान विनेश फोगाट आ बजरंग पुनिया राजनीतिक क्षेत्रमे प्रवेश कयलनि आ शुक्रदिन कांग्रेसमे शामिल भऽ गेलथि।
कांग्रेसक राष्ट्रीय महासचिव के.सी. वेणुगोपाल विनेश आ बजरंगकेँ पार्टीक सदस्यता दिओलनि। ओ कहलनि, “आइ एकटा पैघ दिन अछि। हमसभ आरम्भसँ पहलवानक सङ्ग छी आ आगू सेहो रहब। हमरा एहि दुनू पहलवान पर गर्व अछि।”
एहिसँ किछुए समय पहिने विनेश फोगाट सोशल मीडिया पर रेलवेक नौकरीसँ इस्तीफा देबाक जानकारी देने छलीह।
दुनू ओलंपियनक पार्टीमे स्वागत करैत कांग्रेस नेता पवन खेड़ा कहलनि, “दुनू खेलाड़ी देशक दिल जीत लेने छथि।”
कांग्रेसमे शामिल भेलाक बाद विनेश फोगाट कहलनि, “हमरा खुशी अछि जे हम आइ ओहि पार्टीमे छी, जे हरदम महिलाक सङ्ग अछि। हम मीडियाकेँ सेहो धन्यवाद देबय चाहैत छी जे ओ सभ सदैव हमरासभक सङ्ग रहल। मीडिया हमर आवाजकेँ बुलंद करयमे महत्वपूर्ण भूमिका निभेलक। कठिन समयमे जँ कियो हमर समर्थन कयलक तऽ ओ कांग्रेस छल। जखन हम बृजभूषण शरण सिंहक विरुद्ध आवाज उठौलौंह तखनि देशक प्रत्येक दल हमरासभक सङ्ग ठाढ़ छल, मुदा भाजपा नहिं छल।”
विनेश आगू कहलनि, “हम कांग्रेस पार्टी आ देशकेँ मजबूत करब। जमीन पर रहि काज करब।”
बजरंग पूनिया कहलनि, “हम हमेशा कांग्रेसक संग रहब। कठिन समयमे पूरा देशक पार्टी हमरा संग छल, मुदा भाजपा हमर समर्थन नहि कयलक।”
एहिसँ पहिने कांग्रेसक राष्ट्रीय अध्यक्ष मल्लिकार्जुन खड़गे दुनू पहलवानक निवास पर पहुँचि हुनका सभसँ भेंट कयने छलाह। एहि अवसर पर पार्टीक महासचिव के.सी. वेणुगोपाल सेहो उपस्थित छलाह। खड़गे भेंटक चित्र सेहो अपन एक्स हैंडल पर साझा कयने छलथि।ओ लिखने छलथि, “चक दे इंडिया, चक दे हरियाणा! दुनियांमे भारतक नाम रौशन करनाहर हमर प्रतिभाशाली चैम्पियन विनेश फोगाट आ बजरंग पुनियासँ १० राजाजी मार्ग पर भेँट। हमरा अहाँ दुनू गोटे पर गर्व अछि।”
कांग्रेस सांसद राहुल गांधी सेहो दुनू पहलवानसँ भेंट कयलनि। तहियासँ राजनीतिक हलकामे चर्चा चरम पर पहुँचि गेल छल जे दुनू कांग्रेसमे शामिल भऽ सकैत छथि।
विनेश आ बजरंगकेँ कांग्रेसमे शामिल भेलासँ आगामी विधानसभा चुनावमे पार्टीकेँ लाभ होयत। पार्टी एखन धरि उम्मीदवारक सूचीक घोषणा नहिं कयने अछि। एहेनमे आब सबहक नजरि एहि बात पर रहत जे दुनूकेँ कोन सीट पर मैदानमे उतारल जाएत।
